विराटचोकः पीएलओ ग्रुप प्रालिका निर्देशक भोलेश्वर दुलालले एक दशक अघि पारिवारिक भ्रमणको सिलसिलामा युरोप जाँदा त्यहाँ देखेका सार्वजनिक शौचालयजस्तै शौचालय नेपालमा पनि बनाउने सपना देख्नुभयो ।
उहाँका अनुसार एउटा शौचालयमै धेरै सुविधा देखेपछि आफ्नो देशमा र आफ्नो नगरमा नै यस्ता शौचालय बनाउने भनेर सङ्कल्प गर्नुभयो । युरोपबाट फर्किनासाथ गृहनगर सुन्दरहरैँचामा एउटामात्रै होइन ८ वटा शौचालय बनाउने अठोटका साथ उहाँ छलफलमा जुट्नुभयो । सुन्दरहरैंचाको विराटचोक, सलकपुर, हरैँचा, खोर्साने, मृगौलिया, बलिया, गोठगाउँ र गछियामा सुविधासम्पन्न शौचालय बनाउने र त्यसको नेतृत्व सुन्दरहरैंचा उद्योग वाणिज्य संघले गर्ने निर्णय भयो ।
तत्कालीन नगरप्रमुख शिवप्रसाद ढकालले नगरपालिकाले वर्षभरि सञ्चालन हुने सबै योजनाबाट २ प्रतिशत रकम काटेर शौचालयलाई सहयोग गर्ने निर्णय कार्यपालिकाबाट पारित गराउनुभयो । शौचालय निर्माण महाअभियान सञ्चालन गरियो । सो अभियानमा १ करोडभन्दा धेरै रुपैयाँ सङ्कलन भयो । जसले निर्माण कार्य सहज भयो । नगरमा बन्ने सबै शौचालय एकै आकारका बनाउने निर्णय भएअनुसार सलकपुर र विराटचोकमा शौचालय बने । २०७७ साल असोज २७ गते तत्कालीन प्रदेश प्रमुख शेरधन राईले शौचालयको उद्घाटन गर्नुभयो ।
यी हुन् सुन्दरहरैंचामा रहेका अत्याधुनिक सार्वजनिक शौचालयका विशेषता (विश्व शौचालय दिवस विशेष)
