विराटचोकः सुन्दरहरैंचा नगरपालिकाले आज विराटचोकमा गरेको नगरस्तरीय सार्वजनिक सुनुवाइमा नागरिकको न्यून उपस्थिति देखिएको छ ।
काठमाडौंको टेक मिडिया हाउस प्रालिको सहजीकरणमा भएको सुनुवाइ कार्यक्रमअन्तर्गत हिजो वडा नम्बर ३, ४, ५ र ६ को सार्वजनिक सुनुवाइ भएकोमा आज वडा नम्बर ८, ९, १० र १२ को सार्वजनिक सुनुवाइ भएको हो । सार्वजनिक सुनुवाइमा नगरवासीको उल्लेख्य सहभागिता हुनुपर्ने भए पनि हिजोको सार्वजनिक सुनुवाइमा न्यून उपस्थिति थियो । आजको सुनुवाइमा त अधिकांश कुर्सी खाली नै थिए । जनप्रतिनिधि, नगरपालिकाका कर्मचारी, सञ्चारकर्मी र सुरक्षाकर्मीबाहेक आजको सुनुवाइमा २५ जनाजति सर्वसाधारणको उपस्थिति थियो । उपस्थित सर्वसाधारणमध्ये ९ जनाले आफ्ना जिज्ञासा राखेका थिए ।
नगरपालिकाको सार्वजनिक सुनुवाइमा मुख्य रुपमा जनप्रतिनिधि उत्तरदाताको रुपमा सहभागी हुन्छन् । सबैभन्दा बढी जनसंख्या भएको वडा नम्बर १० का जनप्रतिनिधिको उपस्थिति नै थिएन । सोही वडाबाट विजयी कार्यपालिका सदस्य बबिता खापुङ उत्तरदाताको रुपमा नभएर प्रश्नकर्ताको दीर्घामा बस्नुभएको थियो । आफूले जवाफ दिनुपर्ने जिज्ञासा नसोधिएपछि वडा नम्बर ९ का वडाध्यक्ष प्रकाश श्रेष्ठ पनि कार्यक्रम नसकिई हिँड्नुभएको थियो ।
सुन्दरहरैंचाका ४ वटा वडाको सार्वजनिक सुनुवाइ सम्पन्न
