विराटचोकः सुन्दरहरैंचा नगरपालिकाले यस वर्ष ११ महिनामा १० वटा कार्यविधि, ऐन तथा नियमावली स्थानीय राजपत्रमा प्रकाशन गरेको छ । ती नियमावली २ पृष्ठदेखि १७४ पृष्ठसम्म लामा छन् ।
नगरले यस वर्ष पहिलो नियमावली २०८१ बैशाख २१ गते ल्याएको थियो । बैशाख २० गते कार्यपालिकाले निर्णय गरेपछि २१ गते प्रमाणीकरण भएको विद्यालय शिक्षा नियमावलीमा १८ अनुसूची र १२० नियम रहेका छन् ।
‘सुन्दरहरैँचा नगरपालिका क्षेत्रमा आधारभूत तथा माध्यमिक शिक्षालगायतका शैक्षिक कार्यक्रम व्यवस्थापन र सञ्चालन गर्न सुन्दरहरैँचा नगरपालिकाको विद्यालय शिक्षा ऐन २०७९ नियम ४८ को उपनियम १ ले दिएको अधिकार प्रयोग गरी सुन्दरहरैँचा नगर कार्यपालिकाको मिति २०८१÷०१÷२० गतेको बैठकबाट नियमावली स्वीकृत गरी लागू गरिएको छ’, १४९ पृष्ठ लामो सो नियमावलीमा उल्लेख छ ।
असार २४ गते प्रमाणीकरण भएको आर्थिक ऐन २०८१ असार २५ गते राजपत्रमा प्रकाशित भएको छ । सो ऐन ६७ पृष्ठ लामो छ ।
सुन्दरहरैँचा नगरपालिकाको विनियोजन ऐन, २०८१ पनि असार २५ गते नै राजपत्रमा प्रकाशित भएको छ । सो ऐन १७४ पेज लामो छ ।
कर्मचारीहरूलाई प्रोत्साहन भत्ता उपलब्ध गराउने सम्बन्धी मापदण्ड २०८१ कात्तिक २१ गते राजपत्रमा प्रकाशित भएको छ । सो मापदण्ड ८ पेजको छ ।
स्थानीय सेवाका कर्मचारीको तहवृद्धि सम्बन्धी कार्यविधि, २०८१ कात्तिक २१ गते राजपत्रमा प्रकाशित भएको छ । यो कार्यविधि ७ पेजको छ ।
शीत भण्डार गृह सञ्चालन तथा व्यवस्थापन कार्यविधि, २०८१ पुस २१ गते नगर कार्यपालिकाबाट स्वीकृत भई पुस २२ गते राजपत्रमा प्रकाशित भएको छ । यो कार्यविधि ५ पृष्ठको छ । सो कार्यविधिमा उल्लेख भएअनुसार शीत भण्डार गृहको संयोजक नगर प्रमुख रहनुहुनेछ ।
करार सेवाका कर्मचारीलाई अवकाश दिने सम्बन्धी मापदण्ड, २०८१ नगर कार्यपालिकाबाट २०८१ माघ २१ मा स्वीकृत भई माघ २९ मा राजपत्रमा प्रकाशित भएको छ । यो मापदण्ड ४ पृष्ठको छ ।
आर्थिक (पहिलो संशोधन) ऐन, २०८१ नगर कार्यपालिकाबाट २०८१ माघ २२ गते स्वीकृत भई माघ २९ गते राजपत्रमा प्रकाशित भएको छ । २ पृष्ठको यस संशोधित ऐनमा २ वटा विषयको शुल्क परिवर्तन गरिएको छ ।
सहकारी (दोस्रो संशोधन) ऐन, २०८१ माघ २२ गते नगरसभाबाट स्वीकृत भई माघ २९ गते राजपत्रमा प्रकाशित भएको छ । २ पृष्ठको यस संशोधित ऐनमा सहकारी ऐन २०७५ को दफा ४ मा ४ वटा उपदफाहरु थपिएका छन् ।
सूचना तथा सञ्चार कार्यविधि, २०८१ माघ २१ गते नगर कार्यपालिकाबाट स्वीकृत भई माघ २९ गते राजपत्रमा प्रकाशित भएको छ । कार्यविधिमा ११ पृष्ठ रहेका छन् । यो कार्यविधि नै सुन्दरहरैंचाको स्थानीय राजपत्रमा प्रकाशित सबभन्दा पछिल्लो कार्यविधि हो ।
सम्बन्धित समाचारहरू
सञ्चारको क्षेत्रमा सुन्दरहरैंचा नगरपालिकाको सह्रानीय कदम (नगर स्थापना दिवस विशेष)
