विराटचोकः राष्ट्रिय प्राकृतिक स्रोत तथा वित्त आयोगले सार्वजनिक गरेको तथ्याङ्क अनुसार कार्यसम्पादन मूल्याङ्कनमा मोरङको लेटाङ नगरपालिका ५७ दशमलव ८ अंक प्राप्त गर्दै जिल्लाकै दोस्रो पालिका बनेको छ । गत वर्ष सार्वजनिक आर्थिक वर्ष २०७९\०८० को कार्यसम्पादन मूल्याङ्कनमा लेटाङ चौधौँ स्थानमा थियो ।
आर्थिक वर्ष २०८०\०८१ को कार्यसम्पादन मूल्याङ्कनमा मोरङ जिल्लामा विराटनगर महानगरपालिका पहिलो बनेको छ । विराटनगर ७३ दशमलव ५ अङ्क प्राप्त गरी पहिलो हुँदा लेटाङ नगरपालिका ५७ दशमलव ८ अङ्क प्राप्त गरी दोस्रो र सुन्दरहरैँचा नगरपालिका ५५ दशमलव ६ अङ्क प्राप्त गरी तेस्रो स्थानमा रहेको छ ।
चौथो स्थानमा रहेको बुढीगंगाले ५४ दशमलव ६ र पाँचौँ स्थानमा रहेको केराबारी गाउँपालिकाले ५३ दशमलव ७ अंक पाएको छ । मोरङमा सबैभन्दा कम अंक पाउने धनपालथान गाउँपालिकाले ३२.९ अंक पाएको छ ।
राष्ट्रिय प्राकृतिक स्रोत तथा वित्त आयोगले स्थानीय तहहरूलाई अनुदान वितरण गर्दा कार्यसम्पादनका आधारमा वितरण गर्ने व्यवस्था गरेको छ । आर्थिक व्यवस्थापन, पूर्वाधार विकास, सामाजिक सेवाहरूको प्रभावकारिता र प्रशासनिक क्षमताजस्ता कार्यसम्पादन मूल्याङ्कनका सूचकहरुको अङ्कभारका आधारमा अङ्क प्रदान गरिन्छ ।
लेटाङ नगरपालिका नगरप्रमुख भुपेन्द्रकुमार लावतीले आफू निर्वाचित भएर आएदेखि नै कार्यसम्पादन र सुशासनलाई प्राथमिकतामा राखेर काम गरेकाले सोही अनुसारको परिणाम आएको बताउनुभयो ।
