विराटचोकः कुमारी बैंक लिमिटेडको गत आर्थिक वर्षमा खुद नाफा ४५ हजार ८२९ प्रतिशतले बढाएर २ अर्ब ११ करोड ६४ लाख रुपैयाँ नघाएको छ । बैंकले अघिल्लो आर्थिक वर्ष जम्मा ४६ लाख रुपैयाँ नाफा कमाएको थियो ।
इम्पेरिमेन्ट चार्जअन्तर्गत राखेको ६ अर्ब ८४ करोड रुपैयाँबाट २ अर्ब ७९ करोड रुपैयाँमा झारेपछि नाफा बढेको हो । कुनै पनि कर्जा खराब वर्गमा वर्गीकरण भएमा बैंकहरुले राष्ट्र बैंकको निर्देशनअनुसार शतप्रतिशतसम्म कर्जा नोक्सानी व्यवस्थापन गर्नुपर्ने हुन्छ । यस्तो कर्जा असुली हुन थालेसँगै बैंकहरुले नोक्सानी व्यवस्थापनमा राखेको उक्त पैसालाई नाफामा देखाउन सक्ने व्यवस्था छ । कुमारीको हकमा यस्तै भएको हो ।
बैंकको वितरणयोग्य नाफा २ अर्ब ७९ करोड रुपैयाँले ऋणात्मक छ । अघिल्लो वर्ष ५ अर्ब ३६ करोडले ऋणात्मक हुँदा लगानीकर्ताले लाभांश पाएका थिएनन् । गत आर्थिक वर्षको नाफाबाट पनि लगानीकर्ताले लाभांश नपाउने देखिन्छ ।
बैंकको खुद ब्याज आम्दानी पनि बढेर ११ अर्ब ५५ करोड पुगेको छ । बैंकको खराब कर्जा अनुपात ६ दशमलव ४२ प्रतिशत रहेको छ ।
