खाँदबारीः कोशी प्रदेश खेलकुद विकास बोर्ड विराटनगरको आयोजनामा संखुवासभा सदरमुकाम खाँदबारीमा फागुन १५ देखि १९ गतेसम्म मुख्यमन्त्री कप राष्ट्रिय भलिबल प्रतियोगिता हुने भएको छ ।
भलिबल संघका केन्द्रीय सदस्य प्रवीण श्रेष्ठका अनुसार प्रतियोगितामा ७ प्रदेशका ७ टिम तथा विभागीय टिम नेपाली सेना, नेपाल प्रहरी र सशस्त्र प्रहरी सहभागी हुने छन् । भलिबल संघ संखुवासभाले संयोजन गर्ने प्रतियोगिताका लागि जिल्ला खेलकुद विकास समिति संखुवासभा र कोशी प्रदेश भलिबल संघले सहकार्य गर्ने भएको छ ।
प्रतियोगिता सञ्चालन गर्न करिब ४० लाख रुपैयाँ खर्च हुने अनुमान गरिएको भलिबल संघ संखुवासभाका अध्यक्ष मोदिनी घिमिरेले बताए । कोशी प्रदेशबाट २० लाख बजेट विनियोजन भएको र बाँकी २० लाख रुपैयाँअन्तर्गत जिल्लाका १० वटै स्थानीय तहबाट १–१ लाख रुपैयाँ र अन्य सहयोगीदातहरूबाट रकम सङ्कलन गरिने बताइएको छ ।
लिग कम नकआउटको आधारमा हुने प्रतियोगितको विजेताले ३ लाख रुपैयाँ, उपविजेताले १ लाख ५० हजार रुपैयाँ, तेस्रो हुनेले ५० हजार रुपैयाँ र चौथो हुने टिमले ३० हजार रुपैयाँ पाउनेछन् । उत्कृष्ट ५ विधामा जनही नगद ५० हजार तथा सर्वोत्कृष्ट पुरस्कार नगद २५ हजार रुपैयाँ पाउने बताइएको छ ।
