खाँदबारीः खाँदबारीबाट धनकुटातर्फ आउँदै गरेको प्रदेश १–०२–००२ च ४१०३ नम्बरको जीप आज संखुवासभाको धर्मदेवी नगरपालिका–८ सुर्तीबारीबाट अरुण नदीमा खसेको छ ।
पैदलयात्री चैनपुर नगरपालिका–११ का ६६ वर्षीय ढोकरबहादुर पाण्डेलाई ठक्कर दिएपछि जीप अनियन्त्रित भएर सडकबाट करिब ५० मिटर तल अरुण नदीमा खसेको प्रहरीले जनाएको छ ।
प्रहरीका अनुसार सो जीपमा जीम मालिक र चालक दुई जना सवार थिए । उनीहरू जीपबाट हाम फालेका थिए । हाम फालेका खाँदबारी नगरपालिका–९ तुम्लिङटारका ४० वर्षीय जीवन राई र जीप चालक मकालु गाउँपालिका–५ मांसिमाका २० वर्षीय किरण गुरुङको उद्दार गरिएको प्रहरीले जनाएको छ ।
जीपको ठक्करबाट घाइते भएका र अरुण नदीबाट उद्दार गरिएकासहित तीनै जनाको तुम्लिङटारको मनकामना अस्पतालमा उपचार भइरहेको प्रहरीले जनाएको छ ।
