विराटचोकः सुन्दरहरैंचा नगरपालिकामा नगर प्रमुख केदारप्रसाद गुरागाईको नेतृत्वमा बनेको स्थानीय सरकारले हालसम्म गरेका विकास निर्माण, नीति तथा कार्यक्रम कार्यान्वयन र उपलब्धिहरूको समग्र विवरण समेटेर जानकारी पुस्तिका प्रकाशन गरेको छ ।
नयाँ वर्षको अवसर पारेर प्रकाशित सो पुस्तिकामा पूर्वाधार विकास क्षेत्रमा नगरपालिकाले आन्तरिक तथा बाह्य स्रोतबाट जम्मा ३२ किलोमिटर सडक कालोपत्रे निर्माण गरेको उल्लेख गरिएको छ । यस्तै, ३० किलोमिटर पेबल्स सडक, ४४ किलोमिटर ग्राभेल, ११ किलोमिटर ड्रेन र ४४ किलोमिटर एजिङ निर्माण भएको जनाइएको छ ।
विगत ३ आर्थिक वर्षको सामाजिक, कृषि, स्वास्थ्य, शिक्षाका साथै विकास निर्माण लगायत धेरै क्षेत्र समेटिएको सो बुकलेटमा वन, वातावरण र विपद् व्यवस्थापनको अवस्थाका बारेमा पनि उल्लेख गरिएको छ । यस्तै सार्वजनिक सेवा र क्षमता विकाससँग सम्बन्धित नियमावली, कार्यविधि, निर्देशिका र ऐन को तथ्याङ्क समेटिएको छ । यस्तै न्यायिक समितिले गरेका काम उल्लेख गरिएको छ ।
हालसम्म १४ वटा ऐन, ६ वटा नियमावली, १८ वटा कार्यविधि, २ वटा निर्देशिका र २ वटा मापदण्ड गरी जम्मा ४२ वटा कानुनी दस्तावेज तयार पारिएको बताइएको छ ।
चैत अन्तिम साता भएको नेकपा एमालेको नगर अधिवेशनमा पहिलो पटक वितरीत सो बुकलेट हाल नगरपालिका र वडा कार्यालयमा जाने सेवाग्राहीलाई वितरण गर्ने गरिएको छ ।
