लेटाङः कमलपुर सामुदायिक वन उपभोक्ता समूह लेटाङले आर्थिक विपन्न उपभोक्ताहरुको स्वास्थ्य बीमा कार्यक्रमलाई निरन्तरता दिएको छ । उपभोक्ता समूहको सभहलमा विशेष कार्यक्रम गरी सो समुदायिक वन समूहले ४५ जना उपभोक्ताको स्वास्थ्य बीमा गराएको छ ।
बीमा अभिकर्तालाई नै कार्यक्रममा बोलाएर २७ जनाको नयाँ बीमा तथा १८ जनाको बीमा नवीकरण गराइएको हो । उपभोक्ता समूहका अध्यक्ष गोपाल श्रेष्ठको अध्यक्षता तथा लेटाङ– ३ का वडाध्यक्ष डम्बरबहादुर राईको प्रमुख आतिथ्यतामा कार्यक्रम भएको थियो ।
कार्यक्रममा सामुदायिक वन उपभोक्ता महासंघकी केन्द्रीय उपमहासचिव सीता श्रेष्ठ, सामुदायिक वन उपभोक्ता जिल्ला महासंघका कोषाध्यक्ष इन्दू चौधरी, सामुदायिक वन उपभोक्ता महासंघ लेटाङका अध्यक्ष आनन्दसागर तिम्सिना, लेटाङ– ३ की वडा सदस्य शरणकुमारी बिक, सब डिभिजन वन कार्यालय लेटाङका सहायक वन अधिकृत स्वस्तिकनन्द सुवेदीलगायतले ती उपभोक्तालाई बीमा कार्ड हस्तान्तरण गर्नुभएको थियो ।
