गछियाः ६८ औँ राष्ट्रिय सहकारी दिवसको पूर्वसन्ध्यामा शनिबार कनकलक्ष्मी बचत तथा ऋण सहकारी संस्था लिमिटेड सुन्दरहरैंचाले गछिया बजारको सरसफाइ गरेको छ ।
सो सहकारी संस्थाको सञ्चालक तथा लेखा सुपरीवेक्षण समितिका पदाधिकारी र विभिन्न उपसमितिका पदाधिकारी सरसफाइ कार्यक्रममा सहभागी भएका थिए । त्यस्तै, संस्थाका कर्मचारी, शेयर सदस्य, स्थानीय बासिन्दा, जनपद तथा ट्राफिक प्रहरीलगायत सरसफाइ कार्यक्रममा सहभागी भएका थिए ।
संस्थाको कार्यालयबाट शुरु भएको सरसफाइ कार्यक्रम गछिया खोलाको पुलसम्म सञ्चालन भएको थियो । दक्षिणतर्फ दुलारी बचत तथा ऋण सहकारी संस्थाको कार्यालयसम्म सरसफाइ गरिएको थियो ।
सहकारी दिवसको दिन चैत २० गते जिल्लाभरका सबै सहकारीले विराटनगरमा सामुहिक रुपमा सहकारी दिवस मनाउने भएकाले कनकलक्ष्मीले दिवसको पूर्वसन्ध्यामा बजार सरसफाइ कार्यक्रम सञ्चालन गरेको संस्थाका व्यवस्थापक गोपाल देउजाले जानकारी दिनुभयो ।
सुन्दरहरैंचाका ८ ओटा सहकारी संस्था एकीकरण भएर बनेको सो सहकारी प्रदेशकै एक उत्कृष्ट सहकारी संस्थाको रुपमा रहेको छ ।
