विराटचोकः मन्त्रिपरिषद्ले अन्ततः नेपाल विद्युत् प्राधिकरणका कार्यकारी निर्देशक कुलमान घिसिङलाई बर्खास्त गर्ने निर्णय गरेको छ । सोमबार बसेको मन्त्रिपरिषद् बैठकले घिसिङलाई प्राधिकरणको कार्यकारी निर्देशकबाट पदमुक्त गर्ने निर्णय गरेको हो । कुलमानको कार्यकाल २४ साउन २०८२ मा सकिँदै थियो ।
कुलमानको ठाउँमा मन्त्रिपरिषद्ले प्राधिकरणकै पूर्वकार्यकारी निर्देशक हितेन्द्रदेव शाक्यलाई कार्यकारी निर्देशक नियुक्त गर्ने निर्णय गरेको छ । यसअघि २५ साउन २०७८ मा तत्कालीन कार्यकारी निर्देशक शाक्यलाई हटाएर कुलमानलाई सो पदमा दोस्रोपटक नियुक्त गरिएको थियो ।
सरकारसँगको लामो द्वन्द्वपछि मन्त्रिपरिषद्ले १२ फागुनमा कुलमानलाई पदबाट किन नहटाउने भन्दै सफाइ पेश गर्न भन्दै स्पष्टीकरण सोधेको थियो । डेडिकेटेड र ट्रंकलाइन विवादमा सरकार र कुलमानबीच विवाद थियो । ऊर्जा, जलस्रोत तथा सिँचाइ मन्त्रालयले पनि पटक–पटक स्पष्टीकरण सोधेको थियो ।
२०७३ सालको तिहारदेखि लोडसेडिङ अन्त्य गरेपछि कुलमानको प्रशंसा शुरु भएको थियो ।
