विराटचोकः सामुदायिक विकास मञ्च उर्लाबारीद्वारा सञ्चालित सामुदायिक पुस्तकालयद्वारा आयोजित गजलकारसँग भावनाका रङ शीर्षकमा भएको गजल वाचनमा ५ जना गजलकारले आफ्ना गजल वाचन गर्नुभएको हो ।
महारूद्र शिवालय मन्दिर, उर्लाबारी ६, सूर्य चोकमा भएको कार्यक्रममा झापाको कमल गाँउपालिका निवासी कल्पना आचार्य, झापाको हल्दीबारी निवासी कुमारी चेम्जोङ, झापाको चन्द्रगढी निवासी खगेन्द्रा खुशी, सुनसरीको इनरुवा निवासी राधा सुवेदी र मोरङको उर्लाबारी निवासी मुना आत्रेयले आफ्ना गजल प्रस्तुत गर्नुभएको थियो ।
प्रत्येक गजलकारले पहिलो चरणमा ४ वटा र अन्तिम चरणमा २ वटा गजल वाचन गर्दा कार्यक्रम हलमा उपस्थितहरुले ताली, हुटिङ र ‘वान्स मोर, वान्स मोर’ भनेर उत्साह थपेका थिए । साँझ ७ बजे शुरु भएको कार्यक्रम साढे ९ बजे सकिँदासम्म दर्शकहरुको राम्रो उपस्थिति थियो ।
कार्यक्रममा उर्लाबारीका कलाकार अच्युत अधिकारी, कमला फुयाल र लीला पौडेलले गीत प्रस्तुत गर्नुभएको थियो ।
उर्लाबारी वडा नम्बर ६ का वडाध्यक्ष चिन्तामणि पौडेलले प्रमुख अतिथिको आसनबाट सम्बोधन गर्दै वाचित गजलले राजनीतिप्रति पनि तीखो व्यङ्ग्य गर्न सफल भएको बताउनुभयो ।
स्वागत मन्तव्य तथा कार्यक्रमको औचित्य र सामुदायिक विकास मञ्चको उद्देश्यको बारेमा आयोजक संस्थाका अध्यक्ष प्रेम बोहोराले प्रकाश पार्नुभएको थियो ।
कार्यक्रममा साहित्यकार बालचन्द्र सुब्बा, मिश्र वैजयन्तीका साथै उर्लाबारी आसपासका साहित्यअनुरागीको बाक्लो उपस्थिति थियो ।
