तस्बिर स्रोत: जल तथा मौसम विज्ञान विभाग
विराटचोकः असार २० गतेसम्म भारी वर्षा हुने र सबैभन्दा बढी कोशी प्रदेश प्रभावित हुने जल तथा मौसम विज्ञान विभागले जनाएको छ । भारी वर्षाबाट ३४ जिल्ला अति प्रभावित हुनेमा कोशी प्रदेशका उदयपुरबाहेक बाँकी १३ जिल्ला परेका छन् । विभागले विशेष बुलेटिन जारी गर्दै कोशी, बागमती, गण्डकी र लुम्बिनी प्रदेशका ३४ जिल्लामा रेड अलर्ट जारी गरेको छ । २६ जिल्लामा मध्यम जोखिमको सम्भावना रहेको जनाएको छ ।
कोशी प्रदेशका ताप्लेजुङ, पाँचथर, संखुवासभा, तेह्रथुम, मोरङ, झापा, सुनसरी, इलाम, धनकुटा, भोजपु्र, खोटाङ, सोलुखुम्बु र ओखलढुंगा तथा बागमती प्रदेशका मकवानपुर, चितवन, सिन्धुपाल्चोक र दोलखा जिल्ला, गण्डकी प्रदेशका म्याग्दी, बागलुङ, कास्की, पर्वत, स्याङ्जा, तनहुँ, नवलपरासी पूर्व र लमजुङ जिल्ला तथा लुम्बिनी प्रदेशका कपिलवस्तु, रुपन्देही, पाल्पा, अर्घाखाँची, गुल्मी, प्युठान, नवलपरासी पश्चिम, रोल्पा र रुकुम पूर्व अति जोखिममा रहेका छन् ।
विभागका अनुसार असार १७ गते सोमबारदेखि असार २० गते बिहीबारसम्म देशभर साधारणतयादेखि पूर्णतया बदली रही देशका धेरै स्थानहरूमा हल्कादेखि मध्यम वर्षाको सम्भावना छ । कोशी प्रदेश, बागमती प्रदेश, गण्डकी प्रदेश र लुम्बिनी प्रदेशका थोरै स्थानहरूमा तथा मधेश, कर्णाली र सुदूरपश्चिम प्रदेशका एक–दुई स्थानमा भारी वर्षाको सम्भावना छ ।
