विराटचोकः भोलिदेखि मोरङको सुन्दरहरैचाको विराटचोकमा रहेको औद्योगिक प्रदर्शनी स्थलमा ‘सुन्दरहरैंचा फुड फेस्टिभल–२०८३’ आयोजना हुने भएको छ ।
सुन्दरहरैंचा उद्योग वाणिज्य सङ्घको आयोजनामा भोलिदेखि कात्तिक १० गतेसम्म सुन्दरहरैंचा–१०, विराटचोकस्थित सुन्दरहरैंचा औद्योगिक प्रदर्शनी केन्द्रमा फेस्टिभल सञ्चालन हुने भएको हो ।
सुन्दर होटल पर्यटन व्यवसायी सङ्घ सह–आयोजक रहेको फेस्टिभलमा दुई लाखभन्दा बढी दर्शक तथा अवलोकनकर्ता सहभागी हुने अपेक्षा गरिएको आयोजकले जनाएको छ । दशैं, तिहार, नेपाल संवत् तथा छठ पर्वको अवसर पारेर आयोजना गर्न लागिएको फेस्टिभलमा स्थानीय स्वाद, मौलिक संस्कृति र मनोरञ्जनलाई विशेष प्राथमिकता दिइने जनाइएको छ ।
विभिन्न जातजातिका परम्परागत खाद्य परिकार, कृषि तथा घरेलु उत्पादन, हस्तकला र व्यापारिक सामग्रीको प्रदर्शनी तथा बिक्री फेस्टिभलका प्रमुख आकर्षण रहने बताइएको छ । साँझमा साङ्गीतिक प्रस्तुति प्रस्तुत हुने भएको छ ।
राजेश पायल राई, सविन राई, रचना रिमाल, डम्बर नेपाली, प्रीति आले मगर, एलिना चौहान, मिलन परियार तथा विभिन्न साङ्गीतिक ब्याण्डको प्रस्तुति रहने साङ्गीतिक साँझ बेलुका १० बजेसम्म चल्ने जनाइएको छ ।
पारिवारिक घुमघामसँगै स्थानीय परिकारको स्वाद लिँदै मनोरञ्जन गर्न सकिने उत्सवका रूपमा फेस्टिबललाई लिइएको संघका अध्यक्ष नारायण कार्कीले जानकारी दिनुभयो ।
विभिन्न खाद्य परिकारका २० वटा स्टल रहने फेस्टिबलमा १४ वटा व्यावसायिक र बाँकी स्थानीय उत्पादन तथा सामाजिक र सांस्कृतिक क्षेत्रको प्रवद्र्धनका लागि निःशुल्क स्टल उपलब्ध गराइने मेला आयोजक समितिका संयोजक तथा संघका वरिष्ठ उपाध्यक्ष ज्ञानप्रसाद ढकालले जानकारी दिनुभयो ।
सङ्घका महासचिव हरि कार्कीले फेस्टिभललाई व्यवस्थित र सुरक्षित बनाउन आवश्यक तयारी भइरहेको बताउनुभयो । फेस्टिभललाई सफल बनाउन समाजका विभिन्न व्यक्तित्वसँग छलफल र अन्तरक्रिया जारी रहेको उहाँको भनाइ थियो ।
सोे फेस्टिभलबाट १ करोड दुई लाख रुपैयाँ आम्दानी हुने अनुमान आयोजकले गरेको छ । टिकट बिक्रीबाट ८५ लाख रुपैयाँ, मुख्य प्रायोजक तथा सह–प्रायोजकबाट १० लाख रुपैयाँ र मनोरञ्जन तथा खेलकुद गतिविधिबाट सात लाख रुपैयाँ आम्दानी हुने अनुमान गरिएको जनाइएको छ ।
करिब १५ लाख रुपैयाँ बचत गर्ने लक्ष्य रहेको र सो रकम सङ्घको संस्थागत विकास, व्यवसायीको हित, सामाजिक उत्तरदायित्व तथा आगामी कार्यक्रम सञ्चालनमा उपयोग गरिने जनाइएको छ ।
फेस्टिभलको मुख्य प्रायोजक नेपालीरिका होटल रहेको छ। प्रायोजकहरूमा पार्थिभरा फुड प्रोडक्ट, चामुण्डा फुड (बेली), कञ्चनजङ्घा इन्जिनियरिङ प्रा.लि., प्रणाम इँटा, प्रिन्स इँटा, टुबोर्ग बियर, म्याक्स टाइगर इनर्जी ड्रिंक्स, ग्रिनसिटी हाउजिङ र आर.एन.जी. ग्रुप रहेका छन् ।
फेस्टिभलका विषयमा शुक्रबार आयोजित पत्रकार सम्मेलनमार्फत आयोजकले कार्यक्रमको तयारी, मुख्य आकर्षण, व्यवस्थापन र अन्य विभिन्न विषयमा जानकारी दिएको हो ।
