बिर्तामोडः सहारा नेपाल बचत तथा ऋण सहकारी संस्था लिमिटेडको सञ्चालक समिति र लेखा सुपरिवेक्षण समितिको निर्वाचनमा उम्मेदवारको संख्या उल्लेख्य देखिएको छ । आगामी असोज १० गते हुने निर्वाचनका लागि १२ पदमा ८० जनाले उम्मेद्वारी दर्ता गराएका छन् ।
एउटै संस्थाको नेतृत्व र निगरानी गर्ने सीमित पदका लागि यति ठूलो संख्यामा उम्मेदवारी पर्नुलाई संस्थाप्रतिको सदस्यहरूको चासो, जिम्मेवारी बहन गर्ने इच्छा र नेतृत्वमा पुग्ने आकांक्षाका रूपमा हेर्न सकिन्छ । सहकारी क्षेत्रमा लामो समयदेखि स्थापित सहारा नेपाल साकोसको निर्वाचनमा देखिएको यो सहभागितालाई सकारात्मक रूपमा लिनुपर्ने आवाज पनि उठेको छ ।
अन्तिम उम्मेद्वारी नामावली यही भदौ २० गते प्रकाशन हुने कार्यतालिका छ । अन्तिम नामावली प्रकाशन हुनुअघि नै सबै उम्मेदवार एकै ठाउँमा बसेर संस्थाको आवश्यकता, भविष्य र हितलाई केन्द्रमा राख्दै सर्वसम्मत नेतृत्व चयन गर्न सकिने सम्भावनाबारे छलफल गर्नुपर्ने प्रस्ताव अघि सारिएको छ ।
अन्तिम नामावली प्रकाशनअघि उम्मेदवारहरूबीच छलफल गरेर सबैको सम्मान हुने गरी योग्य र सक्षम व्यक्तिहरू समेटिएको सर्वसम्मत समिति निर्माण गर्न सकिए त्यसले निर्वाचन खर्च, समय र सम्भावित गुटगत प्रतिस्पर्धा घटाउनुका साथै संस्थाभित्रको एकता थप मजबुत बनाउन सक्ने केही शेयर सदस्यको धारणा छ ।
