विराटचोकः आज फागुन २१ गते प्रतिनिधि सभा सदस्य चयनका लागि देशभर शान्तिपूर्ण रुपमा मतदान सम्पन्न भएको छ। यसैबीच मोरङ जिल्लाको निर्वाचन क्षेत्र नम्बर ३ मा अघिल्लो पटकको मत परिणाम कस्तो थियो भन्ने यहाँ देखाउने प्रयास गरिएको छ ।
कांग्रेसका सुनिल शर्मा फराकिलो मतान्तरले विजयी हुँदा नायिका रेखा थापा तेस्रो
मोरङ क्षेत्र नम्बर ३ मा गत निर्वाचनमा नेपाली कांग्रेसका सुनिल शर्मा फराकिलो मतान्तरले विजयी हुनुभएको थियो । शर्मा ४८,६१३ मत ल्याएर विजयी हुँदा नेकपा एमालेका भानुभक्त ढकालले २५,८९७ र तेस्रो स्थानमा रहनुभएकी अभिनेत्री रेखा थापाले राष्ट्रिय प्रजातन्त्र पार्टीबाट १०,९९८ मत ल्याउनुभएको थियो ।
सो क्षेत्रमा प्रत्यक्षतर्फ ९७,१२६ मत खसेकोमा ९२,२०२ मत सदर भएको थियो । समानुपातिकतर्फ ९७,२६७ मत खसेकोमा ९३,२६३ मत सदर भएको थियो ।
एमालेले समानुपातिकतर्फ र प्रत्यक्षतर्फ ल्याएको मत झण्डै बराबर
प्रत्यक्षमा उठेका उम्मेद्वारले पाएको मतभन्दा समानुपातिकमा सो दलले पाएको मत केही कम र कुनै क्षेत्रमा निकै कम हुने गर्छ । तर, मोरङ क्षेत्र नम्बर ३ मा नेकपा एमालले गत निर्वाचनमा प्रत्यक्षमा र समानुपातिकतर्फ पाएको मतमा धेरै भिन्नता छैन ।
समानुपातिकतर्फ नेपाली कांग्रेसले २९,८५९, नेकपा एमालेले २५,०२८ रास्वपाले १४,४०८, राष्ट्रिय प्रजातन्त्र पार्टीले ९,३७२, नेपाल कम्युनिष्ट पार्टी (माओवादी) ले ४६४४ र एकीकृत समाजवादी पार्टी नेपालले ३,९७२ मत ल्याएका थिए । समानुपातिकमा सबैभन्दा कम बहुजन शक्ति पार्टी नेपालले ३ मत ल्याएको थियो ।
सो क्षेत्रमा अघिल्लो निर्वाचनमा ६४ प्रतिशत मतदाताले मतदान गरेका थिए ।
क्षेत्र नम्बर ३ मा यस पटक १,५८,०५७ जना मतदाता रहेका छन् । जसमा ७७,१७० जना पुरुष तथा ८०,८८३ जना महिला र ४ जना अन्य लिङ्गी रहेका छन् ।
