विराटनगरः कीर्तिपुरमा जारी नेपाल प्रिमियम लिग (एनपीएल) अन्तर्गत आजको खेलमा लुम्बिनी लायन्सले विराटनगर किंग्सलाई पराजित गरेपछि विराटनगर किंग्सको प्ले अफमा पुग्ने चाहना कमजोर बनेको छ । खेल खेल्न बाँकी रहेका टिमको प्रदर्शनपछि मात्र विराटनगर किंग्सको प्ले अफको यात्रा थाहा हुनेछ ।
आजको खेलमा विराटनगरले दिएको १४५ रनको लक्ष्य लुम्बिनीले १७.४ ओभरमा ५ विकेट गुमाएर पूरा गरी ६ खेलमा तेस्रो जीत निकालेको हो । ६ खेल खेल्दा ६ अंक जोडेको लुम्बिनी चौथो स्थानमा उक्लेको छ । लुम्बिनीले अब लिगको अन्तिम खेल जनकपुर बोल्ट्ससँग शुक्रबार खेल्नेछ ।
विराटनगरले ६ खेलमा दोस्रो हार बेहोरी ८ अंक जोडेको विराटनगर तेस्रो स्थानमा छ । विराटनगरले लिगको अन्तिम खेल शनिबार हालसम्म अपराजित रहँदै प्लेअफ पुगिसकेको सुदूरपश्चिम रोयल्सँग खेल्नेछ ।
आजको खेलमा लुम्बिनीको जीतमा डार्सी सर्टले सर्वाधिक ५७ रन बनाए । उनले ४४ बल खेल्दै ६ चौका र २ छक्का प्रहार गरे ।
यस्तै विकेटकिपर निरोशन डिकवेलाले अविजित २९ रन योगदान गरे । सन्दीप जोराले २४ र दिलीप नाथले १६ रन जोडे । सुमित महर्जनले १० रन जोडे ।
बलिङमा विराटनगरका कप्तान सन्दीप लामिछानेले ४ ओभरमा २० रन खर्चेर २ विकेट लिए । सुभाष भण्डारीले ४ ओभरमा ३० रन खर्चेर २ विकेट लिए ।
कीर्तिपुरस्थित त्रिवि अन्तर्राष्ट्रिय क्रिकेट स्टेडियममा टस हारेर पहिले ब्याटिङ गरेको विराटनगरले निर्धारित २० ओभरमा ८ विकेट गुमाएर १४४ रन बनाएको थियो ।
विराटनगरका लागि वान डाउनमा ब्याटिङ गरेबका लोकेश बमले ४२ बल खेल्दै ३५ रन जोडे । यस्तै बसिर अहमदले १९ बलमा १ चौका र १ छक्का प्रहार गर्दै २८ रन योगदान गरे ।
साम हिजलेटले २० बलमा २७ रन बनाए । यसै खेलबाट एनपीएलमा डेब्यु गर्दै ओपनिङ गरेका दक्षिण अफ्रिकी खेलाडी फाफ डु प्लेसी ९ बलमा १२ रन बनाएर आउट भए । प्रतिश जिसीले ११ रन जोडे ।
बलिङमा लुम्बिनी लायन्सका शेर मल्लले ४ ओभरमा २४ रन खर्चेर ३ विकेट लिए । जेजे स्मिथ, अभिशेष गौतम र रुबेन ट्रम्पलम्यानले १–१ विकेट लिए ।
प्रतियोगिताअन्तर्गत भोलिको पहिलो खेल बिहान पौने १२ बजे काठमाण्डु गोर्खाज र पोखरा एभेन्जर्सबीच तथा दोस्रो खेल साँझ ४ बजे सुदूर पश्चिम रोयल्स र चितवन राइनोजबीच हुनेछ ।
