भद्रपुरः झापा बारकी सह–सचिव एवं महिला समिति संयोजक अधिवक्ता सानु कार्की बस्नेतले झापा कारागारका कैदीबन्दीहरूको लागि पुस्तक उपलब्ध गराउनुभएको छ ।
कारागारमा रहेका कैदीबन्दीहरूको बौद्धिक क्षमता र चेतनाको अभिवृद्धि गर्ने उद्देश्यले पराग नामक २ थान पुस्तक हस्तान्तरण गर्नुभएको हो ।
सो पुस्तकको अध्ययनबाट कैदीबन्दीहरूमा सार्वजनिक प्रशासन, संविधान, कानुन लगायतका समसामयिक विषयवस्तुको बारेमा सैद्धान्तिक र व्यावहारिक जानकारी हुने अपेक्षा र विश्वासका साथ पुस्तक हस्तान्तरण गरेको कार्कीले बताउनुभयो ।
अधिवक्ताको यस कार्यलाई सामाजिक उत्तरदायित्व र मानवीय समाजसेवाको उदाहरणका रूपमा लिन सकिने भनी कारागार कार्यालय झापाका प्रमुख पूर्णबहादुर खत्रीले बताउनुभयो ।
कारागार कार्यालय झापाको पुस्तकालयका लागि हस्तान्तरण गरिएको सो पुस्तक सार्वजनिक प्रशासन, कर्मचारी प्रशासन र शासकीय व्यवस्थापनका नविन सोच, शैली र अभ्यास एवं सार्वजनिक प्रशासन सुधारका आयामहरूलाई समेटी नेपाल राष्ट्रिय निजामती कर्मचारी संगठनले प्रकाशित गरेको हो ।
कारागारको पुस्तकालयमा रहेका पुस्तक अध्ययनबाट कैदीबन्दीहरूमा पढ्ने बानीको विकास भई खाली समयको सदुपयोग हुने र उनीहरूमा शिक्षा, ज्ञान र सकारात्मक सोचको विकास हुन्छ । सकारात्मक सोच र असल व्यवहारको विकासले अपराधबाट टाढा रही समाजमा पुनःस्थापित हुन र असल नागरिक बन्न प्रेरित हुन्छ ।
