लेटाङः नगरवासीलाई आगामी आर्थिक वर्षको बजेटको बारेमा कार्यक्रम गरी जानकारी दिन आयोजित बजेट सार्वजनिकीकरण कार्यक्रममा लेटाङ नगरपालिकाले विभिन्न क्षेत्रमा उत्कृष्ट भएका व्यक्ति तथा संस्थालाई सम्मान गरेको छ ।
सोमबार कोशी प्रदेशका प्रदेश प्रमुख पर्शुराम खापुङको प्रमुख आतिथ्यतामा सम्पन्न नगरपालिकाको बजेट, नीति तथा कार्यक्रम सार्वजनिक कार्यक्रममा जग्गादाता, उत्कृष्ट शैक्षिक संस्था, सेवाप्रदायक कर्मचारी, शिक्षक, विद्यार्थी, खेलाडी र किसानहरूलाई सम्मान गरिएको हो ।
जग्गादाता सम्मानित
सो कार्यक्रममा लेटाङ– ५ मा वडा कार्यालय भवन र स्वास्थ्य केन्द्र निर्माणको लागि निःशुल्क जग्गा उपलब्ध गराउने टोमनाथ मगर, पुनम मास्की मगर, घनश्याम मगर, मानबहादुर चौहान, डम्बरकुमारी कार्की र अर्थबहादुर कार्कीलाई सम्मान गरिएको हो । उहाँहरुलाई दोसल्ला ओढाएर सम्मानपत्र प्रदान गरिएको थियो ।
शिक्षक तथा कर्मचारीलाई सम्मान
चालु आर्थिक वर्षमा सेवा निवृत्त भएका शिक्षक र कर्मचारीलाई नगरपालिकाले सम्मान गरेको छ । शिक्षक–कर्मचारीहरू श्रीप्रसाद ढकाल, नारायण खतिवडा र बलबहादुर मगरलाई दीर्घकालीन सेवाको कदर गर्दै सम्मानपत्र प्रदान गर्नुका साथै दोसल्ला ओढाइएको थियो । नगरपालिकाले ‘इनोभेटिभ टिचर’ को रूपमा देवराज सापकोटा (लक्ष्मी मावि, लेटाङ–२) र ‘नगरको उत्कृष्ट कर्मचारी’ को रूपमा सि.अ.हे.व. इन्द्रकलाकुमारी चौधरी (वारङ्गी स्वास्थ्य चौकी, लेटाङ–७) लाई सम्मान गरिएको छ । दुवै जनालाई सम्मानपत्र प्रदान र दोसल्ला प्रदान गरिएको थियो ।
उत्कृष्ट विद्यार्थीलाई सम्मान
२०८० सालको एसईई परीक्षमा सामुदायिक विद्यालयतर्फबाट उत्कृष्ट जीपीए ३ दशमलव ७० प्राप्त गर्ने लक्ष्मी माध्यमिक विद्यालय, लेटाङ–२ की छात्रा पूजा दाहाल र ३ दशमलव ९१ जीपीए प्राप्त गर्ने शिक्षा विकास माध्यमिक विद्यालय, लेटाङ–५ का आभाष मिश्रलाई सम्मान गरिएको थियो । उहाँहरूलाई जनही नगद ५ हजार प्रदान गरिएको थियो ।
यस्तै २०८० सालको एसईई परीक्षमा संस्थागत विद्यालयतर्फ ३ दशमलव ६५ जीपीए ल्याउने ग्यालेक्सी एकेडेमी, लेटाङ–३ की सामना लिम्बू र ३ दशमलव ४५ जीपीए प्राप्त गर्ने लेटाङ ग्रीनभ्याली एकेडेमी, लेटाङ–४ का गौरव अधिकारीलाई सम्मान गरिएको थियो । उहाँहरूलाई जनही नगद ५ हजार प्रदान गरिएको थियो ।
२०८१ सालको कक्षा ८ को वार्षिक परीक्षामा उत्कृष्ट नतिजा ल्याउने विद्यार्थीहरूलाई पनि सो समारोहमा सम्मान गरिएको थियो । उत्कृष्ट जीपीए ल्याउनेमध्ये लक्ष्मी मावि, लेटाङ–२ की अनुस्का मगर, शान्ति भगवती मावि, लेटाङ–४ का पृथ्वीराज कटुवाल र नोबेल एजुकेशन डेभलपमेन्ट एण्ड फाउण्डेसन, लेटाङ–८ का अर्लि मगर र आयुस खत्रीलाई सम्मान गरिएको हो । उहाँहरूलाई जनही नगद ५ हजार प्रदान गरिएको थियो ।
उत्कृष्ट कार्यसम्पादन गर्ने विद्यालय पुरस्कृत
शैक्षिक क्षेत्रमा उत्कृष्ट कार्यसम्पादन गर्ने विद्यालयमध्ये शान्ति भगवती मावि लेटाङ–४ ले पहिलो र श्री शिक्षा विकास मावि लेटाङ–५ ले दोस्रो स्थान प्राप्त गर्दै नगद अनुदानसहित सम्मान प्राप्त गरेका छन् । आधारभूत विद्यालयतर्फ श्री बाल विकास आ.वि. लेटाङ–१ पहिलो र श्री पब्लिक आ.वि. लेटाङ–६ दोस्रो भएका छन् ।
२०८१ को एसईईमा सर्वाधिक प्रतिशत विद्यार्थी उत्तीर्ण गराउने विद्यालय लेटाङ–७ पित्लुम्बा स्थित लक्ष्मी माविलाई पनि सम्मान गरिएको थियो ।
उत्कृष्ट तीन जना किसान सम्मानित
कार्यक्रममा उत्कृष्ट कृषकतर्फ कफी खेती गर्ने लेटाङ– ७ का राजविक्रम राई, च्याउ खेती गर्ने लेटाङ– ९ का राजन सापकोटा र तरकारी खेती गर्ने लेटाङ–३ की पलमकुमारी मगरलाई सम्मान गरिएको थियो ।
पदक विजेता खेलाडी सम्मानित
कार्यक्रममा भलिबल खेलाडी लीला लिम्बू, सोलिना लिम्बू र स्मृति राईलाई सम्मान गरिएको थियो । बी डिभिजन क्लबबाट खेल्न सफल फुटबल खोलाडी ध्रुव तिरुवा र सुमन मगरलाई पनि सम्मान गरिएको थियो ।
यस्तै प्रदेशस्तरीय कराते प्रतियोगितामा स्वर्णपदक विजेता खेलाडी दीपशिखा राई र पुजन बिकलाई पनि कार्यक्रममा सम्मान गरिएको थियो ।
लेटाङले विगत वर्षमा झैँ नगरवासीसामु यसरी गर्याे आगामी आर्थिक वर्षको बजेट सार्वजनिक
नयाँ अभ्यास गर्दै लेटाङ, बजेट पारित भएपछि पत्रकार सम्मेलन गरी बजेटको जानकारी र सवालजवाफ
