गछियाः मोरङको सुन्दरहरैंचा–५ स्थित देवस्थल शिवालय किरातेश्वर मन्दिरमा गत वर्ष झैँ यस वर्ष पनि श्रावण मासोत्सव आयोजना हुने भएको छ ।
आज मन्दिर परिसरमा पत्रकार सम्मेलन गरी द्वितीय श्रावण मासोत्सव मूल आयोजक समितिले दिएको जानकारी अनुसार असार ३० गतेदेखि साउन २६ गतेसम्म विशेष धार्मिक कार्यक्रम सञ्चालन गरिने भएको हो ।
महादेवको प्रतिष्ठा गरिएको पवित्र तीर्थस्थलका रूपमा स्थापित सो मन्दिरमा प्रत्येक वर्ष श्रावण महिनाको सोमबार विशेष पूजाआजा तथा धार्मिक कार्यक्रमहरू आयोजना हुँदै आएको छ । यसपटकको मासोत्सवमा बिहान दर्शन–शिवाभिषेक, यज्ञ–हवन, दुग्धाभिषेक, शिवपुराण पाठ, भजन–कीर्तन, शिवगुरु सम्मेलन, र सांस्कृतिक कार्यक्रमहरू समेत सञ्चालन हुने आयोजकले जनाएको छ ।
मन्दिरका संरचना, धर्मशाला, पर्खाल, गेट, उद्यान, शिवलिंग लगायतका निर्माण कार्यहरूमा समाजसेवी, श्रद्धालु तथा भक्तजनहरूको अतुलनीय योगदान रहेको र तिनको निरन्तर संरक्षण आवश्यक रहेको पत्रकार सम्मेलनमा वितरित प्रेस विज्ञप्तिमा उल्लेख गरिएको छ ।
मन्दिर व्यवस्थापन समिति र द्वितीय श्रावण मासोत्सव मूल आयोजक समितिले भक्तजन, श्रद्धालु र शुभेच्छुकलाई मासोत्सवमा सहभागी हुन अनुरोध गरेका छन् ।
समितिका सदस्य सचिव बलराम दाहालद्वारा हस्ताक्षरित विज्ञप्तिमा महोत्सवलाई भव्य, शालीन र श्रद्धायुक्त वातावरणमा सम्पन्न गर्न सबै पक्षको सक्रियता रहने अपेक्षा गरिएको छ ।
मासोत्सवमा साउन महिनाभर तारा कुइँकेलले पाठ पारायण गर्नुहुने भएको छ । विभिन्न विद्वानहरुले हरेक दिन शिवमहिमाको जानकारी दिने आयोजकले जनाएको छ ।
दिवङ्गत समाजसेवी तथा वरिष्ठ चिकित्सक डा. पिनाकीप्रसाद आचार्यद्वारा वि. सं. २०३७ सालमा ४ कठ्ठा जमिन प्रदान गरेपछि २०३९ सालमा मन्दिर स्थापना भएको थियो ।
