विराटचोकः जेठ महिनामा सुन्दरहरैंचासँग सम्बन्धित समाचारले देश, विदेशमा राम्रो चर्चा पाए । सबैभन्दा बढी चर्चा ढुकुर जोडीका लागि आवेदन दिन खुलेको सूचनाले सुन्दरहरैंचाको नाम नेपालभर मात्र होइन विश्वभर नै चिनायो । एक सातासम्म सोही विषयलाई लिएर सामाजिक सञ्जालमा ट्रोल बनिरहे । सञ्चारमाध्यम र सामाजिक सञ्जालका लागि राम्रो ‘मसला’ को रुपमा देखियो सो समाचार ।
यी हुन् सुन्दरहरैंचासँग सम्बन्धित केही समाचारः
२ जेठ
सुन्दरहरैंचा नगरपालिका ४ नं वडा कार्यालयको सभाहलमा जागृत युवा समाजको आयोजना तथा आवासका लागि सहयोग समूह (लुमन्ती)को आर्थिक सहयोगमा जलवायु परिवर्तन तथा विपद् व्यवस्थापन सम्बन्धी अभिमुखीकरण सम्पन्न । सुन्दरहरैंचा विभिन्न विद्यालयका विद्यार्थी र जागृत युवा समाजका सदस्यलगायत २५ जनाको उपस्थितिमा कार्यक्रम सम्पन्न
६ जेठ
सुकुना बहुमुखी क्याम्पसका ६ जना विद्यार्थी देशभरका उत्कृष्ट ३० विद्यार्थीमा पर्न सफल । त्रिभुवन विश्वविद्यालयले सार्वजनिक गरेको वार्षिक परीक्षाफलअन्तर्गत २०८१ सालको बीबीएस प्रथम वर्षको परीक्षामा योगेश अधिकारीले सर्वाधिक ८१.४ प्रतिशत अङ्क ल्याएर नेपालमै तेस्रो स्थान हासिल गर्न सफल । शङ्करदेव मण्डलले ७९.२ प्रतिशत ल्याई सातौं, उत्तम सञ्जेलले ७७.२ प्रतिशत ल्याई अठारौं र योगेश कार्कीले ७७ प्रतिशत ल्याएर उन्नाइसौं स्थानमा उत्तीर्ण । विज्ञान संकाय (बीएस्सी) तर्फ दिया घिमिरेले ८५.४ प्रतिशत अङ्क ल्याई देशभर दोस्रो स्थान प्राप्त गर्नुभएको छ । समीक्षा पौडेलले ७३.२ प्रतिशत अङ्क ल्याई २१ औं स्थान हासिल गर्न सफल भएपछि क्याम्पसले गर्याे सम्मान ।
७ जेठ
न्यायिक समितिमा सम्बन्ध विच्छेदका मुद्दा बढेपछि त्यसलाई रोक्न नीति तथा कार्यक्रममा समावेश गरिएको उत्कृष्ट ढुकुर जोडीलाई पुरस्कृत गर्ने कार्यक्रमका लागि निवेदन आह्वान । उत्कृष्ट ढुकुर जोडीमा पर्नका लागि विभिन्न १२ शर्तसहित निवेदन माग । देशभर यस कार्यक्रमको विषयलाई लिएर सकारात्मक र नकारात्मक टिप्पणी ।
विराटचोकस्थित नेपालिरिका होटलमा इन्द्रपुर जेसीजले आयोजना गरेको ‘जेसीआई नेपाल बिजनेस एकेडेमी २०२५’ कार्यक्रम शुरु ।
९ जेठ
परोपकार महिला समूहको आयोजनामा तथा सुन्दरहरैंचा नगरपालिकाको आर्थिक सहयोगमा पाककला बेकरी तालिम शुरु । तलिममा २४ जनाको सहभागिता ।
१० जेठ
इन्द्रपुर जेसीजले आयोजना गरेको ‘जेसीआई नेपाल बिजनेस एकेडेमी २०२५’ कार्यक्रम सम्पन्न । सो कार्यक्रममा देशभरबाट ६८ जना जेसीजकर्मी सहभागी ।
१४ जेठ
सुन्दरहरैंचा नगरपालिका वडा नम्बर ७ को आर्थिक सहयोग तथा दलित उत्थान समन्वय समिति सुन्दरहरैंचाको आयोजनामा वडा नम्बर ७ का दलित समुदायको क्षमता विकासका लागि आयोजित उद्घोषण तालिम सम्पन्न ।
१५ जेठ
गणतन्त्र दिवसको अवसर पारेर नेपाल रेडक्रस सोसाइटी सुन्दरहरैंचाको समन्वयमा भएको रक्तदानमा ५८ पिण्ट रगत सङ्कलन ।
गत वर्ष झैँ यस वर्ष पनि सुन्दरहरैंचा उद्योग वाणिज्य संघको आयोजनामा संघीय बजेट सुन्ने र अन्तरक्रिया गर्ने कार्य सम्पन्न ।
नझरेका फूलहरुको आयोजनामा सुन्दरहरैंचामा त्रिदिवसीय सृजना उत्सव शुरु । पहिलो दिनको कविता विशेष उत्सव साहित्यकार कुन्ता शर्माको प्रमुख आतिथ्यतामा सम्पन्न ।
१६ जेठ
सहायता सामाजिक संस्था सुन्दरहरैंचा र लभ्ली एन्जल्स बोर्डिङ सुन्दरहरैंचा–२ मृगौलियाको संयुक्त आयोजनामा स्वास्थ्य शिविर सम्पन्न ।
नझरेका फूलहरुको आयोजनामा सुन्दरहरैंचामा त्रिदिवसीय सृजना उत्सवको दोस्रो दिन गजल उत्सव सम्पन्न । साहित्यकार प्रा.डा. भीम खतिवडाको प्रमुख आतिथ्यतामा कार्यक्रम सम्पन्न ।
१७ जेठ
नझरेका फूलहरुको आयोजनामा सुन्दरहरैंचामा त्रिदिवसीय सृजना उत्सवमा गजलकार प्रा.डा कृष्णहरि बराल सम्मानित । सम्मानित बरालको प्रमुख आतिथ्यतामा भएको कार्यक्रममा साहित्यकार डा. नवराज लम्साल, मनु मञ्जिललगायतको उपस्थिति ।
राष्ट्रिय निजी तथा आवासीय विद्यालय एसोसिएसन नेपाल (एनप्याब्सन) कोशी प्रदेशले ‘विद्यालय शिक्षामा परिवर्तनकारी नेतृत्व’ विषयक कार्यशाला कार्यक्रम सलकपुरमा सम्पन्न । कार्यशालामा कोशी प्रदेशका विभिन्न जिल्लाबाट सहभागी संस्थापक प्रिन्सिपल तथा शिक्षकहरूको शैक्षिक र संगठनात्मक विकासलाई लक्षित गर्दै विभिन्न प्रस्तुति दिइएको थियो ।
१८ जेठ
कनकलक्ष्मी बचत तथा ऋण सहकारी संस्थाद्वारा सुन्दरहरैंचाका १९५ जना विद्यार्थीलाई झोला वितरण ।
१९ जेठ
सलकपुर खानेपानी उपभोक्ता तथा सरसफाइ समितिको नयाँ नेतृत्व चयनका लागि नेकपा एमाले निकट प्रगतिशील समूहद्वारा पत्रकार सम्मेलन गरी रामप्रसाद लुइँटेलको नेतृत्वमा उम्मेद्वारी घोषणा र प्रतिबद्धता सार्वजनिक ।
२१ जेठ
सलकपुर खानेपानी उपभोक्ता तथा सरसफाइ समितिको नयाँ नेतृत्व चयनका लागि नेपाली कांग्रेस निकट लोकतान्त्रिक समूहद्वारा पत्रकार सम्मेलन गरी श्यामप्रसाद ढकालको नेतृत्वमा उम्मेद्वारी घोषणा र प्रतिबद्धता सार्वजनिक ।
आवासका लागि सहयोग समूह (लुमन्ती) को आयोजनामा सामुदायिक योजना तर्जुमाका लागि जनता र जनप्रतिनिधिबीच अन्तरसंवाद कार्यक्रम सम्पन्न ।
समता समाज नेपाल सुन्दरहरैंचाको आयोजनामा भएको समता कप खुला नकआउट फुटसल प्रतियोगितामा योङ स्टार भाउन्ने विजयी । योङ स्टारले ३ का विरुद्ध ७ गोल गर्दै एबी फाइभ विराटनगरलाई पराजित गरेको थियो ।
२३ जेठ
स्वतन्त्र नागरिक समाजको तेस्रो वार्षिकोत्सव जननी आधारभूत विद्यालय सुन्दरहरैंचा ३ का सबै ३० जना विद्यार्थीलाई जुत्ता र कपी वितरण गर्दै सम्पन्न । कार्यक्रम हरियाली विराटनगरका अभियन्ता पारुल क्षेत्रीको प्रमुख आतिथ्यतामा भएको थियो ।
२४ जेठ
सलकपुर खानेपानी उपभोक्ता तथा सरसफाइ समितिको नयाँ नेतृत्व चयनका निर्वाचन सम्पन्न । २५४८ उपभोक्तामध्ये १७१२ जनाले गरे मतदान ।
सर्जक गणेश रसिकको स्मृतिमा नझरेका फूलहरूद्वारा श्रद्धाञ्जली साँझ आयोजना । गायक लाक्पा शेर्पाको प्रमुख आतिथ्यतामा भएको कार्यक्रममा विभिन्न सर्जकले स्वर्गीय रसिकका तथा आफ्ना गीत प्रस्तुत गर्नुभएको थियो ।
२६ जेठ
सलकपुर खानेपानी उपभोक्ता तथा सरसफाइ समितिको नयाँ नेतृत्वका लागि भएको निर्वाचनबाट स्वतन्त्र प्यानलका रामबहादुर तामाङ विजयी । सचिव, सहसचिव र कोषाध्यक्ष पदमा पनि सोही प्यानलबाट विजयी । उपाध्यक्षमा कांग्रेस निकट लोकतान्त्रिक प्यानलका दीपक गुरुङ विजयी ।
२७ जेठ
ब्राइट फ्युचर माध्यमिक विद्यालय सलकपुरका ३ जना विद्यार्थी राष्ट्रिय भलिबल प्रतियोगिताका लागि छनोट भएपछि विद्यालयले गर्याे जीतको कामनासहित बिदाइ ।
२८ जेठ
डिपु टोल विकास संस्था सुन्दरहरैंचाको पहिलो वार्षिक साधारण सभा सम्पन्न ।
पाथीभरा स्वतन्त्र महिला समाज सुन्दरहरैंचाको आयोजनामा मुढा बुन्ने १५ दिन तालिम सुन्दरहरैंचा नगरपालिका वडा नम्बर ६ को कार्यालयमा शुरु ।
प्रगति महिला समाजको आयोजना तथा सुन्दरहरैंचा नगरपालिकाको आर्थिक सहयोगमा सञ्चालित मागमा आधारित ढाकाको कपडा बुन्ने तालिम सम्पन्न । ७८ दिन सञ्चालित तालिममा सुन्दरहरैंचाका १५ जना महिलाले सीप सिकेका थिए ।
२९ जेठ
सुनलाई विलासिताको वस्तुमा राखेर सरकारले भन्सार कर बढाएपछि सुन्दरहरैंचाका सुनचाँदी व्यवसायी आन्दालित भएका छन् । उनीहरुले सो करको विरुद्धमा र्याली निकालेका छन् ।
३० जेठ
गत माघ ३० गतेदेखि फागुन १० गतेसम्म सञ्चालित सुन्दरहरैंचा विराट एक्स्पो ४ को आयव्यय सार्वजनिक । एक्स्पोमा १ करोड ४ लाख ८ हजार २४७ रुपैयाँ आय भएकोमा ३९ लाख ३० हजार ७१८ रुपैयाँ खर्च भएको थियो । सो एक्स्पोमा अझै ३८ लाख १६ हजार ९० रुपैयाँ पाउनुपर्ने देखिएको छ ।
निजी तथा आवासीय विद्यालय अर्गनाइजेशन नेपाल (प्याब्सन) को आयोजनामा जिल्लास्तरीय चित्रकला प्रतियोगिता विराटचोकमा सम्पन्न ।
बालसदन एकेडेमी सुन्दरहरैंचा–९ की विद्यार्थी रेवा पोखरेलले राष्ट्रपति रनिङ शिल्डमा पदक जितेपछि विद्यालयले सम्मान गरेको छ ।
राष्ट्रिय निजी तथा आवासीय विद्यालय अर्गनाइजेशन नेपाल (एन प्याब्सन) को आयोजनामा नगरस्तरीय हस्तलेखन प्रतियोगिता सलकपुरमा सम्पन्न ।
खोलामा करेन्ट लगाएर माछा मार्ने क्रममा सुन्दरहरैंचा–७ खयरडाँडाका दम्पत्ति कान्छा भनिने पूर्ण लिम्बू र उहाँकी श्रीमती भुलमाया लिम्बूको करेन्ट लागेर मृत्यु । घरमा खाना पकाएर, मसला ठीक पारेर माछा मार्न नजिकैको मधाहा खोलामा गएका उनीहरु दुवैलाई माछा मार्ने क्रममा करेन्ट लागेको थियो ।
३१ जेठ
गछिया खानेपानी तथा सरसफाइ उपभोक्ता समितिको साधारणसभा सम्पन्न ।
महिला अधिकारको लागि राष्ट्रिय अभियानको आयोजनामा सुन्दरहरैंचा नगरपालिकाको वडा नम्बर ३ मा क्षमता अभिवृद्धि तथा उद्घोषण तालिम शुरु ।
सुन्दरहरैंचाको नौलो अभियान, ‘ढुकुर जोडी’लाई गरिने भो सम्मान
सुन्दरहरैंचा नगरको ‘ढुकुर जोडी’ सम्मानको सामाजिक सञ्जालमा यसरी भयो आलोचना र समर्थन
