गछियाः मोरङ जिल्लाकै ठूला सहकारी संस्थाहरूमध्येको एक कनकलक्ष्मी बचत तथा ऋण सहकारी संस्था लिमिटेडले सुन्दरहरैंचाका १९५ जना विद्यार्थीलाई स्कुल ब्याग वितरण गरेको छ ।
सहकारी संस्थाका अध्यक्ष नागेश पोखरेलका अनुसार संस्थाले चालु आर्थिक वर्ष २०८१÷०८२ को सामाजिक क्रियाकलाप अन्तर्गतका कार्यहरूमध्ये स्कुल ब्याग वितरण सम्पन्न गरेको हो । संस्थाले सामाजिक क्रियाकलाप अन्तर्गतका रक्तदान तथा सरसफाइ कार्यक्रम यसअघि नै सञ्चालन गरिसकेको उहाँले जानकारी दिनुभयो । यही जेठ १६ र १८ गते सुन्दरहरैँचाका ९ वटा विद्यालयमा अध्ययनरत आर्थिक रूपमा विपन्न परिवारका छात्राछात्रहरूलाई स्कुल ब्याग वितरण गरिएको अध्यक्ष पोखरेलले जानकारी दिनुभयो ।
संस्थाका व्यवस्थापक गोपाल देउजाका अनुसार सुन्दरहरैंचाको वडा नम्बर ४ का जनचेतना आधारभूत विद्यालय हबेली र आदर्श आधारभूत विद्यालय बडहराका विद्यार्थीलाई स्कुल ब्याग वितरण गरिएको हो ।
त्यस्तै, वडा नम्बर ५ का जनसेवा आधारभूत विद्यालय खोक्सी र श्रीलाल आधारभूत विद्यालय लाटीझोडाका विद्यार्थीलाई तथा वडा नम्बर ६ को बुद्ध आधारभूत विद्यालयलाई गुम्बाटोलका विपन्न परिवारका विद्यार्थीलाई स्कुल ब्याग वितरण गरिएको थियो ।
वडा नम्बर ३ लोचनीको श्रीखण्ड माध्यमिक विद्यालय, वडा नम्बर ८ विश्वविद्याल टोलको सिंहदेवी आधारभूत विद्यालय, वडा नम्बर ९ बुधबारेको जनता माध्यमिक विद्यालय र वडा नम्बर ११ शुक्रबारेको महेन्द्र माध्यमिक विद्यालयका विपन्न परिवारका विद्यार्थीलाई स्कुल ब्याग वितरण गरिएको हो ।
यस वर्ष २१ वटा सदस्य शिक्षा तथा विस्तारित मञ्च कार्यक्रम मार्फत १ हजार ५०० भन्दा बढी शेयर सदस्यहरूलाई सहकारीसम्बन्धी सचेतना कार्यक्रम गरी सुझावहरू सङ्कलन गर्ने काम पनि सम्पन्न गरेको व्यवस्थापक देउजाले बताउनुभयो ।
