विराटनगरः कोशी प्रदेश सरकारले यही वैशाख १८ र १९ गते विराटनगरमा लगानी सम्मेलन गर्ने भएको छ । सो सम्मेलनमा ५४ ओटा योजना प्रस्तुत हुने र ती योजनाका लागि १ खर्ब ३९ अर्ब लगानी प्रस्ताव गरिएको लगानी सम्मेलन सचिवालयले जनाएको छ ।
बुधबार विराटनगरमा आयोजित पत्रकार सम्मेलनमा प्रदेश सचिव तथा सम्मेलनका संयोजक पवनकुमार तिम्सिनाले सम्मेलनको तयारी तीव्र पारिएको जानकारी दिनुभयो । सम्मेलनमार्फत प्रदेशमा लगानीको वातावरण सिर्जना गर्न सम्भावनाका नयाँ क्षेत्र खोजी गरिने उहाँको भनाइ थियो ।
कोशी प्रदेश लगानी प्राधिकरणका कार्यकारी निर्देशक सरोज कोइरालाका अनुसार सम्मेलनमा पर्यटन, पूर्वाधार, कृषि, औद्योगिक, उर्जा, सूचना प्रविधि र शहरी फोहोर व्यवस्थापनसँग सम्बन्धित ७ क्षेत्रका ५४ परियोजनालाई प्राथमिकतामा राखिने भएको छ । त्यसपछि वैशाख १९ गते समझदारीपत्रमा हस्ताक्षर गरी नीतिगत र कार्यान्वयन प्रक्रिया अघि बढाइनेछ ।
प्रदेशस्तरमा पहिलोपटक हुन लागेको लगानी सम्मेलन प्रदेश सरकारको मात्र नभएर सिंगो प्रदेशको सम्मेलन भएको कोशी प्रदेशका मुख्यमन्त्री हिक्मतकुमार कार्कीले जानकारी दिनुभयो । कोशी सरकारले तयारी गरेका, सार्वजनिक निजी साझेदारीमा कार्यान्वयन हुने र स्थानीय सरकारले तयार गरेका योजना एकसाथ अघि बढाउने गरी काम गरिएको कार्कीले जानकारी दिनुभयो ।
कोशी प्रदेशका आन्तरिक मामिला तथा कानुनमन्त्री रेवतीरमण भण्डारीले एकद्वार प्रणालीबाट लगानीको वातावरण बनाउन सरकारले सहजीकरण गर्ने बताउनुभयो ।
