बेलबारीः मोरङको बेलबारी बहुमुखी क्याम्पसमा भएको स्ववियु निर्वाचनबाट अध्यक्ष पदमा अनेरास्ववियु क्रान्तिकारीका कपिल विष्ट विजयी हुनुभएको छ ।
अनेरास्ववियुका प्रशान्त पोखरेललाई ३४ मतान्तरले पराजित गर्दै विष्ट निर्वाचित हुनुभएको हो । सचिवमा अनेरास्ववियुका अर्जुन कोइराला विजयी हुनुभएको छ भने कोषाध्यक्षमा क्रान्तिकारीकै नवराज थापा निर्वाचित हुनुभएको छ ।
अघिल्लो निर्वाचनमा नेपाल विद्यार्थी संघको नेतृत्वमा सर्वसम्मत स्ववियु गठन भएको क्याम्पसमा आन्तरिक विवादका कारण यस पटक भने नेविसंघले संगठन नै दर्ता गरेको थिएन ।
मोरङका ३ आंगिकसहित ६ वटामा क्रान्तिकारीले जितेको छ । आंगिक क्याम्पसहरु महेन्द्र मोरङ आदर्श बहुमुखी क्याम्पस, स्नातकोत्तर क्याम्पस र विराट नर्सिङ क्याम्पसका साथै कानेपोखरीको रमाइलो बहुमुखी क्याम्पस, बेलबारी क्याम्पस र मिक्लाजुङ क्याम्पसमा अनेरास्ववियु क्रान्तिकारीले जितेको हो ।
सुकुना बहुमुखी क्याम्पस र केराबारी बहुमुखी क्याम्पसमा अनेरास्ववियुले जित्दा लेटाङ क्याम्पसको स्ववियु अध्यक्षमा भने नेपाल विद्यार्थी संघका उम्मेद्वार विजयी भएका छन् । उर्लाबारी र पथरी क्याम्पसमा सर्वसम्मत नेवि संघका उम्मेद्वार निर्वाचित भएका छन् ।
