सलकपुरः सलकपुर खानेपानी उपभोक्ता तथा सरसफाइ समितिको १७ औँ वार्षिक साधारण सभा हिजो संस्थाको प्राङ्गणमा सम्पन्न भएको छ । मोरङ क्षेत्र नम्बर ३ का सांसद डा. सुनिलकुमार शर्माको प्रमुख आतिथ्यतामा भएको साधारणसभामा संस्थाका अध्यक्ष गजेन्द्र भट्टराईले प्रस्तुत गर्नुभएको संस्थाको वार्षिक प्रतिवेदन संशोधनसहित अनुमोदन भएको छ ।
प्रतिवेदनमा उल्लेख भएका कार्यसमितिले पारित गरेका संस्थाका नीति तथा कार्यविधि संशोधनसहित अनुमोदन भएको हो । साधारणसभाले संस्थाको आर्थिक प्रतिवेदन पनि पारित गरेको छ ।
कार्यक्रमलाई सम्बोधन गर्दै प्रमुख अतिथि शर्माले आवश्यक कागजात नपुगेका कारण सलकपुर खानेपानी उपभोक्ता तथा सरसफाइ समितिका लागि बजेट विनियोजन गर्न नसकिएको बताउनुभयो ।
कार्यक्रममा संघीय खानेपानी तथा ढल व्यवस्थापन आयोजना विराटनगरका प्रमुख सुरतलाल चौधरी, सुन्दरहरैंचा नगरपालिकाका नगर प्रमुख केदारप्रसाद गुरागाईँ, पूर्व नगरप्रमुख शिवप्रसाद ढकाल, सलकपुर खानेपानीका संस्थापक अध्यक्ष लोकप्रसाद सङ्ग्रौला, सल्लाहकार सुशीला कार्की र कृष्णबहादुर भट्टराई, सुन्दरहरैंचा नगरपालिका वडा नम्बर ८ का वडाध्यक्ष खेमप्रसाद न्यौपाने, उपभोक्ता पृथ्वी शिवालगायतले आफ्ना धारणा राख्नुभएको थियो ।
