विराटचोकः सुन्दरहरैंचा उद्योग वाणिज्य संघको आयोजनामा माघ ३० गतेदेखि जारी सुन्दरहरैंचा विराट एक्स्पो ४ मा आयोजकले आज निःशुल्क प्रवेशको व्यवस्था गरेपछि आगन्तुकको संख्या बढ्नुका साथै व्यापार पनि हुन थालेको व्यवसायीले बताएका छन् ।
अघिल्ला दिनमा कृषि उत्पादनको बिक्री कम भएको व्यवसायीले बताएका थिए । हिजो साँझ बसेको एक्स्पो आयोजक समितिको बैठकले परीक्षणको रूपमा आज दिउँसो ३ बजेसम्म आगन्तुकका लागि निःशुल्क प्रवेश गराउने निर्णय गरेको थियो । आज खाद्य सामग्रीका उत्पादन एक्स्पोको स्टलमा राखेका व्यवसायीको बिक्री राम्रै भएको हिमाली प्रोडक्टकी सञ्चालक गंगादेवी राउतले बताउनुभयो ।
‘हिजोसम्म व्यापार नहुँदा निराशा छाएको थियो’, जुम्लादेखि सामान बेच्न ल्याउनुभएकी राउतले भन्नुभयो, ‘आजदेखि सामान बिक्री हुन थालेकाले व्यवसाय राम्रै हुन्छ कि भन्ने आश पलाएको छ ।’
