कानेपोखरीः मोरङको कानेपोखरी गाउँपालिकाले पालिकामा रहेका अपाङ्गता भएका १८ जनालाई बुधबार अपाङ्गता सहायक सामग्री प्रदान गरेको छ ।
गाउँपालिका अध्यक्ष राजमती इङ्गनामका अनुसार अपाङ्गता भएका व्यक्तिहरूलाई ट्राइसाइकल, कृत्रिम खुट्टा, साइम्स, वाकर, लौरो, बैशाखी, सीपी कुर्सी लगायत सहायक सामग्री उपलब्ध गराइएको हो । अपाङ्गता भएका व्यक्तिहरूलाई निश्चित गतिविधिहरू गर्न, समाजभित्र समान पहुँच प्राप्त गर्न गाह्रो हुने भएकाले आवश्यक सहायक सामग्री वितरण गरिएको उहाँले बताउनुभयो ।
कार्यक्रममा प्राविधिक सहयोग सी.बी.आर., समन्वय ओ.पि.डी. नवप्रगति संस्थाको रहेको थियो । कार्यक्रमको आयोजना कानेपोखरी गाउँपालिकाको महिला तथा बालबालिका शाखाले गरेको थियो ।
सामग्री वितरण कार्यक्रममा पालिका अध्यक्ष इङ्गनाम, उपाध्यक्ष भोला अधिकारी र ओ.पि.डी. समितिका सदस्यसहित विभिन्न पदाधिकारीहरू उपस्थित हुनुहुन्थ्यो ।
