विराटचोकः सुन्दरहरैंचामा क्रियाशील सञ्चारकर्मी कृष्णचन्द्र सुवेदी नेपाल रेडक्रस सोसाइटी सुन्दरहरैंचा उपशाखाको दोस्रो वार्षिक साधारणसभामा सम्मानित हुनुभएको छ । सुन्दरहरैंचालाई कार्यक्षेत्र बनाई सक्रिय पत्रकारिता गरिरहेका सुवेदी रेडक्रस सोसाइटी उपाशाखा सुन्दरहरैंचाका संस्थापक टीकाराम ढकालले स्थापना गरेको स्व. मनोरथ ढकाल स्मृति युवा पत्रकारिता पुरस्कारद्वारा सम्मानित हुनुभएको हो ।
नेपाल रेडक्रस सोसाइटी सुन्दरहरैंचा उपशाखाका सभापति घनिन्द्र न्यौपाने, कार्यक्रमका प्रमुख अतिथि सुन्दरहरैँचा नगरपालिका वडा नम्बर ८ का वडाध्यक्ष खेमप्रसाद न्यौपाने, पुरस्कारको दाता परिवारका सदस्यलगायतले पत्रकार सुवेदीलाई सम्मानपत्र प्रदान गरी दोसल्ला ओढाएर नगदसहित सम्मान गर्नुभएको हो ।
कार्यक्रमलाई सम्बोधन गर्दै वडाध्यक्ष न्यौपानेले आगामी दिनमा वडाले रेडक्रससँग सहकार्य गरेर विपद्जन्य कार्यमा हातेमालो गर्ने प्रतिवद्धता जनाउनुभयो । कार्यक्रममा नेपाल रेडक्रस सोसाइटी सुन्दरहरैंचा उपशाखाका सभापति घनिन्द्र न्यौपानेले संस्थाले हालसम्म गरेका कार्य र आगामी योजना समावेश गरिएको वार्षिक प्रतिवेदन प्रस्तुत गर्नुभयो भने कोषाध्यक्षले आर्थिक प्रतिवेदन पेश गर्नुभयो ।
कार्यक्रममा आजवीन सदस्यता लिएकाहरुलाई सदस्यताको प्रमाणपत्र समेत वितरण गरिएको थियो । सोसाइटीका सचिव बाबुराम निरौलाले सञ्चालन गर्नुभएको कार्यक्रममा विभिन्न संघसंस्थाका प्रतिनिधि सञ्चारकर्मीलगायतको उपस्थिति थियो ।
सुवेदी पूर्वी अनलाइन डट कममा आबद्ध हुनुहुन्छ ।
