तेतरियाः मोरङको ग्रामथान गाउँपालिकाको अध्यक्षमा नेकपा माओवादी केन्द्रका नमोनारायण माझी निर्वाचित हुनुभएको छ । हिजो भएको उपनिर्वाचनमा नेपाली कांग्रेसका बलराम सरदार थारुलाई १ हजार ६३६ मतान्तरले हराउँदै माझी निर्वाचित हुनुभएको हो ।
कांग्रेस परित्याग गरी माओवादीमा प्रवेश गरेका माझीले ६ हजार ९६९ मत ल्याउँदा निकटतम प्रतिद्वन्द्वी कांग्रेसका थारुले ५ हजार ३ सय ३३ मत ल्याउनुभएको हो । नेकपा एमालेका तुलसीराम विश्वासले ४ हजार १५९ मत ल्याएर तेस्रो हुनुभयो ।
गत स्थानीय तहको निर्वाचनबाट गाउँपालिका अध्यक्षमा कांग्रेसका जयप्रकाश गच्छदार निर्वाचित हुँदा ७ हजार ६०५ मत ल्याएर विजयी हुनुभएको हो । त्यसबेला एमालेका शिवनारायण माझी थारुले ६ हजार ९३ र माओवादीका विजयकुमार सरदारले २ हजार ७२७ मत ल्याउनुभएको थियो ।
ग्रामथानमा २६ हजार ४४ मतदाता रहेकामा १८ हजार ५७७ मत खसेको थियो ।
