विराटचोकः पछिल्लो पुस्तामा साहित्य कलाको विकाससँगै प्रवर्द्धन गर्दै स्रष्टाको सम्मान गर्न विराटचोकमा साङ्गीतिक गजल महफिल हुने भएको छ ।
यही कात्तिक २४ गते शनिबार राइडर महफिल विराटचोकको आयोजनामा कार्यक्रम हुन लागेको मङ्गलबार पत्रकार सम्मेलन गरी कार्यक्रम संयोजक साहित्यकार छवि वैरागी घिमिरेले बताउनुभयो ।
सुन्दरहरैंचा उद्योग वाणिज्य संघको सभाहलमा हुने गजल महफिलमा विभिन्न ठाउँबाट आउने स्रष्टालाई स्थानीय पर्यटकीय क्षेत्रको अवलोकन गराई पर्यटन प्रवर्द्धनमा सहयोग गरिने घिमिरेले बताउनुभयो ।
महफिलमा गणेशबाबु अधिकारीको ‘रेजा’ पुस्तकमाथि विमर्श हुने भएको छ । सो पुस्तक विमर्शमा अस्मिता विष्ट (वक्ता) रहनुहुने भएको छ । मोरङका युवराज ठकुरी, धादिङका लालकाजी श्रेष्ठ र झापाकी सिन्धु निरौलाले सङ्गीतसहित आफ्ना सुन्दर गजल वाचन गर्ने भएका छन् ।
कार्यक्रमको सहजीकरण सञ्चारकर्मी तथा साहित्यकार विवेक विवश रेग्मीले गर्नुहुने भएको छ ।
