खेमचन्द्र अधिकारी
विराटचोकः सोमबार शेयर बजारमा लामो समयपछि १९ अर्ब ६० करोड ९१ लाख ७७ हजार १०६ रुपैयाँको शेयर कारोबार भयो । जुन कारोबार झण्डै ३ वर्षअघिको हालसम्म कारोबार भएको उच्च रकमको नजिकको अङ्क हो ।
यस अघि २०७८ साल साउन ३१ गते २१ अर्ब ६४ करोड रुपैयाँबराबरको कारोबार भएको थियो । भने २०७८ भदौ ३ गते २० अर्ब ४९ करोडको शेयर किनबेच भएको थियो । त्यस बेला बजार निरन्तर बढिरहेको थियो । अहिले पनि त्यस्तै अवस्था छ । त्यस बेला पनि लचिलो मौद्रिक नीतिले सूचक र कारोबार बढाउन सहयोग गरेको थियो । अहिले पनि त्यस्तै भइरहेको छ ।
सोमबार शेयर बजारमा अहिलेसम्मकै सर्वाधिक कित्ताको कारोबार भयो । सोमबार ४ करोड ७७ लाख ९० हजार ८३७ कित्ता शेयर किनबेच भए । यस अघि ४ करोड ११ लाख कित्तासम्म कारोबार भएको थियो ।
आइतबार बैंकिङ उपसमूहको सूचक नै झण्डै १० प्रतिशत बढेको थियो । स्ट्याण्डर्ड चार्टड बैंकको शेयरभाउ ८ प्रतिशतमात्रै बढेकाले बैंकिङ उपसमूह ९ दशमलव ८९ प्रतिशत मात्रै बढेको थियो । बाँकी सबै बैंकको शेयरमूल्य १० प्रतिशत बढेको थियो । नेपाली शेयर बजारमा सबै बैंकको शेयरमूल्य १० प्रतिशत बढेको यो नै पहिलो पटक भएको बताइएको छ ।
सोमबार नेप्से परिसूचक २०.४६ अंक घटेर २६६१.०९ विन्दुमा झरेको छ । जम्मा ३२५ कम्पीको २ लाख २२ हजार ६६० पटकको कारोबारमा १९ अर्ब ६० करोड ९१ लाख ७७ हजार १०६ रुपैयाँको ४ करोड ७७ लाख ९० हजार ८३७ कित्ता शेयर किनबेच भए ।
बजार घटे पनि नेपाल फाइनान्सको शेयरमूल्य सर्वाधिक ९ दशमलव ७७ प्रतिशत बढ्दा मन्दाकिनी हाइड्रोपावर र बाराही हाइड्रोपावरको शेयरमूल्य ८ प्रतिशतभन्दा बढी बढेको छ भने जानकी फाइनान्स र गणपति लघुवित्तको शेयरमूल्य साढे ६ प्रतिशतभन्दा बढी बढेको छ ।
आरम्भ चौतारी लघुवित्त वित्तीय संस्थाको शेयरमूल्य सबैभन्दा धेरै ८.३५ प्रतिशत घटेको छ । बोटलर्स नेपाल बालाजुको शेयर मूल्य ८ प्रतिशत, अभियान लघुवित्तको शेयरमूल्य ६ दशमलव ८८ प्रतिशत र गुराँस लघुवित्त वित्तीय संस्थाको शेयरमूल्य ६ दशमलव ७२ प्रतिशत घटेको छ ।
शिवम् सिमेन्ट्सको सर्वाधिक ६१ करोड १२ लाख ८६ हजार ६८३ रुपैयाँको कारोबार भएको छ । कुमारी बैंकको ५५ करोड २२ लाख ७६ हजार ९० रुपैयाँको शेयर किनबेच भएको छ । कुमारी बैंकको २४ लाख ६३ हजार ०६९ कित्ता शेयर ८ हजार ३१५ पटकको कारोबारमा किनबेच भएको छ ।
वित्त उपसमूहको परिसूचक सर्वाधिक १.८८ प्रतिशत र जलविद्युत उपसमूहको परिसूचक ०.८१ प्रतिशत बढेको छ । बाँकी ११ उपसमूहको परिसूचक घटेको छ । सबैभन्दा धेरै व्यापार उपसमूहको परिसूचक ४ दशमलव ५४ प्रतिशत घटेको छ ।
बजार घटेसँगै समग्र बजार पूँजीकरण ४२ खर्ब २२ अर्ब ३८ करोड ६६ लाख ७२ हजार ११५ रुपैयाँ कायम भएको छ ।
सोमबार एक घण्टामै ६ अर्बभन्दा बढीको शेयर कारोबार भएको थियो ।
सम्बन्धित समाचारः
