गोठगाउँः सुन्दरहरैंचा–७ स्थित खेलमैदानमा जारी सुन्दरहरैंचा मेयर कप फुटबलमा वडा नम्बर १ लाई ० का विरुद्ध २ गोल गर्दै वडा नम्बर ७ विजयी भई अघिल्लो चरणमा प्रवेश गरेको छ ।
वडा नम्बर ७ लाई विजयी गराउन जर्सी नम्बर ९ का खेलाडी सनम राई र जर्सी नम्बर ५ का खेलाडी विशाल भण्डारीले गोल गरे । राईले खेलको तेस्रो मिनेटमा र भण्डारीले दोस्रो हाफको १६ औँ मिनेटमा गोल गरेका थिए । वडा नम्बर ७ ले गोल गर्ने थुप्रै अवसरको उपयोग गर्न नसक्दा थप गोल गर्न सकेन ।
वडा नम्बर ५ लाई पराजित गरेर बाइ पाएर सिधै खेल्न पुगेको वडा नम्बर ७ सँग भिडेको वडा नम्बर १ ले गरेका उत्कृष्ट प्रहार वडा नम्बर ७ का गोलरक्षक भक्त परियारले रोकेका थिए ।
वडा नम्बर १ का जर्सी नम्बर १४ का खेलाडी विशाल खवासले खेलको २५ औँ मिनेटमा र वडा नम्बर ७ का जर्सी नम्बर ७ का खेलाडी अजय राईले खेलको २० औँ मिनेटमा पहेँलो कार्ड पाएका थिए ।
खेलको म्यान अफ द म्याच वडा नम्बर ७ का गोलकर्ता भण्डारी घोषित हुँदै नगद ३ हजार रुपैयाँ पुरस्कार पाए । कार्यक्रमकी प्रमुख अतिथि सुन्दरहरैंचा नगरपालिकाको शिक्षा शाखा प्रमुख लीला ओझाले भण्डारीलाई सो पुरस्कार प्रदान गर्नुभएको थियो ।
वडा नम्बर ७ ले अब बैशाख ३ गते हुने वडा नम्बर २ र वडा नम्बर ४ बीचको खेलको विजेतासँग बैशाख ५ गते सेमीफाइनलमा प्रतिष्पर्धा गर्नेछ ।
आइतबारको खेल वडा नम्बर ३ र वडा नम्बर ६ बीच हुनेछ ।
