काठमाडौंः विश्वका अर्बपतिको सूचीमा नेपालका विनोद चौधरी १७६४ औँ स्थानमा रहेका छन् । फोर्ब्सले हरेक वर्ष विश्वका अर्बपतिहरूको सूची सार्वजनिक गर्ने गर्दछ ।
सन् २०२४ को नयाँ सूचीअनुसार गत वर्षको तुलनामा विश्वमा १४१ अर्बपतिहरू थपिएका छन् । जसमा ३१ जना भारतबाट मात्रै थपिएका छन् । भारतमा अर्बपतिको संख्या २०० जना पुगेको छ ।
सबै अर्बपतिहरूको संयुक्त सम्पत्ति १४.२ ट्रिलियन डलर छ, २०२३ मा २ ट्रिलियन डलरले बढेको छ । सूचीमा रहेका शीर्ष २० व्यक्तिले सबैभन्दा धेरै पैसा कमाएका छन् र सन् २०२३ सम्ममा आफ्नो संयुक्त सम्पत्ति ७०० बिलियन डलरले बढाएका छन् ।
अमेरिकामा सबैभन्दा धेरै अर्बपति ८१३ जना, चीनमा ४७३ जना र भारतमा २०० जना रहेका छन् ।
बर्नार्ड अर्नाल्ट र उनको परिवार २३३ बिलियन डलरको कुल सम्पत्तिको साथ पहिलो नम्बरमा छन् । उनी एलभीएमएचका प्रमुख हुन् । त्यसपछि एलन मस्क छन् । उनको कुल सम्पत्ति १९५ बिलियन डलर छ । तेस्रो नम्बरमा अमेजनका संस्थापक जेफ बेजोस छन् । उनको कुल सम्पत्ति १९५ अर्ब डलर छ । फेसबुकका संस्थापक मार्क जुकरबर्गको कुल सम्पत्ति १७७ अर्ब डलर रहेको छ ।
नेपालका विनोद चौधरीको कुल सम्पत्ति १.८ बिलियन डलर रहेको फोर्ब्सले जनाएको छ । फोर्ब्सको रियल टाइम बिलनयेर्सको सूचीमा भने उनी १,८०६ औं स्थानमा छन् । चौधरी ग्रुपका अध्यक्ष विनोद चौधरी यसअघि फोर्ब्सको रियल टाइम बिलनयेर्सको सूचीमा १,६५७ औं स्थानमा रहेका थिए । स्थान घटे पनि उनको सम्पत्तिमा भने कुनै परिवर्तन भएको छैन । सन् २०२२ मा फोर्ब्सले उनको कुल सम्पत्ति १.५ बिलियन डलर रहेको उल्लेख गरेको छ । त्यसअघि, २०२१ मा चौधरीको नेटवर्थ १.४ बिलियन डलर रहेको थियो ।
भारतीय अर्बपतिहरूको सूचीको शीर्ष स्थानमा मुकेश अम्बानी छन् । उनको कुल सम्पत्ति ८३ अर्ब डलरबाट बढेर ११६ अर्ब डलर पुगेकाले १०० बिलियन क्लबमा प्रवेश गर्ने पहिलो एशियाली बनेका छन् । मुकेश अम्बानी विश्वको नवौं धनी व्यक्तिको रूपमा रहेका छन् ।
लोरियलका संस्थापककी नातिनी फ्रान्कोइस बेटेनकोर्ट मेयर्स संसारको सबैभन्दा धनी महिला हुन् । उनको कुल सम्पत्ति ९९.५ बिलियन डलर छ । उनीपछि वालमार्टका संस्थापक साम वाल्टनकी छोरी एलिस वाल्टन छिन् । उनको कुल सम्पत्ति ७२.३ बिलियन डलर छ । जेफ बेजोसकी पूर्व पत्नी म्याकेन्जी स्कटको कुल सम्पत्ति ३५.६ बिलियन डलर रहेको छ ।
अर्बपतिको सूचीमा पुग्ने पहिलो कलाकार टेलर स्वीफ्ट बनेकी छिन् । उनको सम्पत्ति १.१ बिलियन डलर रहेको अनुमान गरिएको छ ।
