इटहरीः सुनसरीको रामधुनी नगरपालिका–६ स्थित तेह्र बालबालिका स्मृति आधारभूत विद्यालय जाने मुख्य बाटो बन्द भएपछि करिब ५ सय विद्यार्थी, शिक्षक तथा अभिभावकहरू मर्कामा परेका छन् ।
बाटोमा तारबार लगाएर अवरोध सिर्जना गरिएपछि विद्यालयको पठनपाठन नै प्रभावित भएको छ । विद्यालयका प्रधानाध्यापक सुनिल तिम्सिनाका अनुसार करिब १९ वर्षअघि जग्गा खरिद–बिक्रीका क्रममा विद्यालय तथा बालबालिकाको आवागमनका लागि १६ फिट चौडाइको पहुँच मार्ग छुट्याइएको थियो ।
२०६३ सालमा स्थापित सो विद्यालयमा त्यसयता विद्यालय, विद्यार्थी, शिक्षक तथा स्थानीयको सहमतिमा उक्त बाटो सार्वजनिक रूपमा प्रयोग हुँदै आएको थियो । आफ्नै सवारीसाधनसमेत रहेको उक्त विद्यालयमा मान्छे हिँड्नका लागि साँघुरो ठाउँ छाडिए पनि सवारी साधन चल्न नसक्ने बाटो बनाइएको छ ।
राजकुमार पौडेल र ध्रुव पौडेलले बाटोमा तारबार लगाउँदा बाटो पूर्ण रुपमा बन्द भएको हो । उनीहरुका बुबा भीमबहादुर पौडेल स्वयं विद्यालय स्थापनाकालका संस्थापक अध्यक्ष तथा व्यवस्थापन समितिका पूर्वपदाधिकारी हुनुहुन्छ । पौडेल परिवारको एक कठ्ठा जग्गाको केही भाग बाटोमा परेको विषयलाई लिएर असन्तुष्टि जनाउँदै उनका छोराहरूले बाटोमा तारबार लगाएका हुन् ।
घटनापछि विद्यालय व्यवस्थापन समितिले शान्ति सुरक्षा कायम गर्न र अवरोध हटाउन माग गर्दै वडा कार्यालय, रामधुनी नगरपालिका तथा जिल्ला प्रशासन कार्यालय सुनसरीमा औपचारिक उजुरी दर्ता गराएको छ ।
प्रधानाध्यापक तिम्सिनाले तत्काल छानबिन गरी बाटोमा लगाइएको तारबार हटाइयोस् र दोषीलाई प्रचलित कानुनबमोजिम कडा कारबाही गरियोस् भनी जोडदार माग गरेका छन् ।
विद्यालयले नगरपालिकामा रहेको न्यायिक समितिमा पनि निवेदन दिएको बताइएको छ ।
