गोठगाउँः मोरङको सुन्दरहरैँचा गोठगाउँस्थित पूर्वाञ्चल विश्वविद्यालयको मेडिकल कलेज तथा शिक्षण अस्पतालको अवलोकन गर्दै विज्ञान, प्रविधि तथा नवप्रवर्तनमन्त्री महावीर पुनले विश्वविद्यालयले पढाउने मात्र नभई अनुसन्धान, नवप्रवर्तन र उत्पादनमा जोड दिनुपर्ने बताउनुभएको छ ।
विश्वविद्यालयको स्कुल अफ मेडिसिन विभागका भवन र प्रयोगशालाको अवलोकनपछि मन्त्री पुनले आयुर्वेद तथा जडीबुटी क्षेत्रमा अनुसन्धान गरी औषधि उत्पादनका लागि आवश्यक प्रयोगशाला निर्माण गर्न विश्वविद्यालयलाई निर्देशन दिएका हुन् ।
आयुर्वेदिक उपचारमा नेपालीहरु आकर्षित हुँदै गएका र पूर्वी क्षेत्रमा आयुर्वेदिक उपचार पद्धतिमा विश्वास गरी औषधी प्रयोग गर्ने प्रशस्त भएको आफूले पाएकाले औषधी उत्पादनमा लाग्नुपर्ने देखिएको उहाँको भनाइ थियो ।
