गछियाः हिजोदेखि शुरु भएको गछिया गोल्डकप फुटबल प्रतियोगितामा आयोजक गछिया युवा समाज विदेशी पाहुना टोलीलाई ० का विरुद्ध ७ गोल गरी अघिल्लो चरणमा प्रवेश गरेको छ । आयोजकले लिजेण्ड फुटबल क्लब पश्चिम बंगाल, भारतमाथि गोलको वर्षा गरेको हो ।
रातो जर्सीमा मैदानमा उत्रिएको आयोजकका तर्फबाट जर्सी नम्बर ९ का प्रदीप बुढाथोकीले ह्याट्रिक गरे । खेलको म्यान अफ दि म्याच घोषित हुँदै उनले नगद ५ हजार १०० रुपैयाँ प्राप्त गरे ।
जर्सी नम्बर १७ का सन्तोष उरावले २ तथा जर्सी नम्बर ८ का सन्तोष खत्रीले २ गोल गरेका थिए । पाहुना टोलीले गोल गर्नका लागि पाएको दर्जन अवसरको उपयोग गर्न नसक्दा गोलरहित खेल खेल्दै घर फर्कनुपर्याे ।
भोलिको खेल जलथल फुटबल क्लब झापा र गाईघाट युनाइटेड क्लब उदयपुरबीच खेल हुनेछ ।
मंसिर २२ गते सम्पन्न हुने प्रतियोगितामा ८ टिम सहभागी छन् । प्रतियोगिताको विजेताले ट्रफीका साथमा नगद २ लाख १ हजार रुपैयाँ र उपविजेताले नगद १ लाख १ हजारको साथमा ट्रफी पाउनेछन् ।
हरेक दिनको म्यान अफ द म्याच घोषित खेलाडीले ५ हजार १०० रुपैयाँ प्राप्त गर्नेछन् । प्रतियोगिताको म्यान अफ दि सिरिजले २५ हजार रुपैयाँ प्राप्त गर्नेछ ।
