काठमाडौंः सुदूरपश्चिम रोयल्सले सिद्धार्थ बैंक नेपाल प्रिमियर लिग (एनपीएल) मा बिहीबार लुम्बिनी लायन्सलाई पराजित गर्दै लगातार चौथो जीत हात पारेको छ ।
कीर्तिपुरस्थित त्रिवि अन्तर्राष्ट्रिय क्रिकेट मैदानमा भएको खेलमा सुदूर पश्चिमले लुम्बिनीलाई ७ विकेटले पराजित गरेको हो । लुम्बिनीले दिएको १४४ रनको लक्ष्य सुदूरपश्चिमले १८.२ ओभरमा ३ विकेट गुमाएर पूरा गरेको हो ।
लगातार चार जीतपछि ८ अङ्कका साथ शीर्ष स्थानमा रहेको सुदूरपश्चिम प्लेअफ नजिक पुगेको छ । सुदूर पश्चिमले अब बाँकी ३ मध्ये १ खेल जितेमा पनि प्लेअफमा पुग्नेछ । लुम्बिनीको यो लगातार तेस्रो हार हो । ४ खेलमध्ये एउटा खेलमात्र लुम्बिनीले जितेको छ ।
आजको खेलमा सुदूर पश्चिमका लागि विकेटकिपर विनोदले अविजित ६९ रन बनाए । उनले ४९ बल खेल्दै ५ चौका र ४ छक्का प्रहार गरे । यस सिजनमा भण्डारीको यो पहिलो अर्धशतक हो । यस्तै आरिफ शेखले ३७ बलमा ४ चौका र एक छक्काको मद्दतमा ३९ रन बनाए । क्रिकेट लिनले १९ रनका योगदान गरे भने जोश ब्राउन ९ रनमा आउट भए ।
बलिङमा लुम्बिनीका रुबेन ट्रम्पलम्यान, अभिशेष गौतम र तिलक भण्डारीले समान एकएक विकेट लिए ।
आजको दोस्रो खेलमा जनकपुरसँग टस जितेर पोखरा एभेन्जर्सले अहिले ब्याटिङ गरिरहेको छ ।
