विराटचोकः मोन्था चक्रवातको असरका कारण नेपालका धेरै स्थानमा यति बेला वर्षा भइरहेको छ । पछिल्लो २४ घण्टामा ‘हल्का’देखि ‘अति भारी’सम्म वर्षा भएको जल तथा मौसम विज्ञान विभागले जनाएको छ ।
दिउँसो ३ बजेको तथ्याङ्कअनुसार पछिल्लो २४ घण्टामा मोरङको सुन्दरहरैंचास्थित हरैँचा जलमापन केन्द्रमा सबैभन्दा धेरै २४८.२ मिलिमिटर पानी परेको छ । २०० मिलिमिटरभन्दा धेरै वर्षा हुनुलाई ‘अति भारी’ वर्षा भनिन्छ । त्यस्तै, सप्तरीको बरमझियामा १६० मिलिमिटर वर्षा भएको छ । झापाको शनिश्चरेमा १४६.६ मिलिमिटर वर्षा भएको छ । झापाको दमकमा ११३.४, झापाको अनारमनीमा १०९.४, झापाको बाहुनडाँगीमा १०७.८, इलामको मैनाचुलीमा १०६.८, उदयपुरको उदयपुरगढीमा १००.२ मिलिमिटर वर्षा भएको छ । १०० मिलिमिटरभन्दा धेरै वर्षा हुनुलाई ‘धेरै भारी’ वर्षा भनिन्छ ।
कुनै स्थानमा २४ घण्टामा २०० मिलिमिटरभन्दा धेरै पानी परे ‘अति भारी’ वर्षा भनिन्छ । २४ घण्टामा ५० देखि १०० मिलिमिटरसम्म पानी पर्नुलाई ‘भारी वर्षा’ भनिन्छ । १० देखि ५० मिलिमिटरसम्म पानी परे ‘मध्यम’ वर्षा भनिन्छ । १० मिलिमिटरसम्म पानी परे ‘हल्का’ वर्षा भनिन्छ ।
