विराटचोकः अन्तरिम सरकारमा इमेज च्यानलका समाचार प्रमुख जगदीश खरेल सञ्चारमन्त्री हुनुभएको छ । अहिलेसम्म पत्रकारिता पृष्ठभूमिबाट मन्त्री भएका आधा दर्जन व्यक्ति मन्त्री बनेका छन्, त्यसमध्ये धेरैजसो सञ्चारमन्त्री नै बनेका छन् ।
वर्तमान मन्त्री परिषद्मा उमेर र मर्यादाक्रममा कान्छो सदस्य सञ्चारमन्त्री जगदीश खरेल रहेका छन् ।
पत्रकारिता पृष्ठभूमिबाट सञ्चार मन्त्री बन्ने पहिलो व्यक्ति रमेशनाथ पाण्डे हुन् । पाण्डे पञ्चायतकाल, बहुदलकाल र त्यसपछिको शाहीकालमा सञ्चारसहित विभिन्न मन्त्रालयमा पटकपटक मन्त्री भए । युवा उमेरमै जनता दैनिक, नयाँ सन्देशलगायतका पत्रिकाको सम्पादक भएका पाण्डे अहिले ८२ वर्षको उमेरमा समेत विभिन्न पत्रपत्रिकामा लेख लेखिरहन्छन् । पाण्डे कूटनीतिक क्षेत्रका चतुर खेलाडी पनि मानिन्छन् । त्यहीकारण राज्ञा ज्ञानेन्द्रले २०६१ माघमा सत्तामा हातमा लिए पछि पाण्डेलाई परराष्ट्र मन्त्री बनाएका थिए ।
जयप्रकाश आनन्द
राजनीतिज्ञ जयप्रकाश गुप्ता पत्रकारिता क्षेत्रमा जयप्रकाश आनन्द नामले चिनिन्थे । उनी पञ्चायतकालदेखि नै सुरुचि, विमर्शलगायतका पत्रिकाहरूमा आबद्ध रहेका थिए । नेपाली कांग्रेसका तत्कालीन सभापति गिरिजाप्रसाद कोइरालाका सबैभन्दा प्रिय पात्र मध्येका गुप्ता कोइरालाको पहिलो प्रधानमन्त्रीत्वकालमा सञ्चार सल्लाहकार रहेका थिए । पछि सप्तरीबाट चुनाव जितेर पटकपटक मन्त्री भएका थिए ।
कोइराला र देउवा गुटबीचको विवाद बढ्दै गएपछि २०५७ सालतिर उनी देउवा गुटमा प्रवेश गरेका थिए । छिटै देउवाको पनि विश्वासपात्र बनेका थिए । गुप्ता २०६९ सालमा सञ्चार मन्त्री रहेकै बेला भ्रष्टाचारको मुद्दामा जेल परेका थिए ।
अख्तियार दुरूपयोग अनुसन्धान आयोगले उनलाई २ करोड भन्दा धेरै भ्रष्टाचार गरी अकुत सम्पत्ति कमाएको अभियोगमा मुद्दा दायर गरेको थियो । उक्त मुद्दामा विशेष अदालतले २०६४ सालमा गुप्तालाई सफाइ दिएको थियो । त्यसको विरुद्ध अख्तियारले सर्वाेच्चमा पुनरावेदन दिएको थियो । २०६९ पुसमा हालकी प्रधानमन्त्री सुशीला कार्की सर्वाेच्च अदालतको न्यायाधीश हुँदा उनी र अर्का न्यायाधीश तर्कराज भट्टको इजलासले गुप्ताले ८४ लाख भ्रष्टाचार गरेको ठहर गर्दै बिगो भराउन तथा डेढ वर्ष कैद सजायसहितको फैसला दिएको थियो । त्यतिबेला गुप्ता प्रधानमन्त्री बाबुराम भट्टराईको नेतृत्वको सरकारमा सूचना तथा सञ्चार मन्त्री नै थिए ।
मन्त्री पदमा बहाल रहेकै बेला भ्रष्टाचारको अभियोगमा जेल पर्ने गुप्ता हालसम्मकै एक मात्र मन्त्री हुन् । जेलबाट छुटेपछि अहिले उनी आफ्नै जन्मस्थानमा सप्तरीमा माछापालनलगायतका कृषि कर्म गरेर बसिरहेका छन् ।
रघुजी पन्त
नेकपा एमालेको पोलिटब्युरो सदस्य रहेका पन्त ओली सरकारमा शिक्षा मन्त्री थिए । त्यसअघि उनी २०६० सालमा शेरबहादुर देउवा नेतृत्वको सरकारमा श्रम मन्त्री भएका थिए ।
पञ्चायतकालदेखि नै पत्रकारिता पेशामा आबद्ध रहेका उनी तत्कालीन नेपाल पत्रकार संघको महासचिव पनि भएका थिए । उनी छलफल, दृष्टि र बुधबार जस्ता नेकपा एमाले निकटका पत्रिकाहरूको सम्पादक पनि भएका थिए ।
श्रीष समशेर राणा
२०६१ माघ १९ मा राजा ज्ञानेन्द्रले शेरबहादुर देउवा नेतृत्वको सरकारलाई बर्खास्त गरेपछि शुरुमा टङ्क ढकाललाई सूचना तथा सञ्चार मन्त्री बनाएका थिए । तर पछि ढकाललाई स्थानीय विकास मन्त्री बनाएर श्रीष समशेर राणालाई सञ्चार मन्त्री बनाएका थिए । राजा ज्ञानेन्द्रको निरङ्कुश सरकारको बेला भएकाले उनले सञ्चारमाध्यममा सेन्सरसिप लगाउन मुख्य भूमिका खेलेका थिए ।
गोकुल बास्कोटा
एमालेको पोलिटब्युरो सदस्य रहेका बास्कोटाले शुरुदेखि नै राजनीति र पत्रकारितालाई सँगसँगै अगाडि बढाएका थिए । छलफल, प्रतिपक्ष, दृष्टिलगायतका एमाले निकट पत्रिकामा सम्पादकीय भूमिकामा रहेका बास्कोटा २०७४ पछि केपी ओली नेतृत्वमा बनेको सरकारमा सञ्चारमन्त्री बनेका थिए ।
प्रिन्टिङ प्रेस खरिद प्रकरणमा ७० करोड रुपैंया बार्गेनिङ गरेको अडियो प्रकरण सार्वजनिक भएपछि विवादमा परेका थिए । त्यहीकारण उनले मन्त्री पदबाट राजीनामा दिएका थिए । सो प्रकरणको वास्तविकता के हो भन्ने बारेमा अहिलेसम्म पनि सार्वजनिक हुन सकेको छैन । अख्तियारले पुष्टि हुन नसकेको भन्दै उक्त प्रकरणलाई मुलतबीमा राखेको छ ।
रवि लामिछाने
टेलिभिजन पत्रकारिताबाट राजनीतिमा प्रवेश गरेर छोटो समयमै गृहमन्त्रीसम्म हुन पुगेका व्यक्ति हुन् रवि लामिछाने । उनी २०७९ को आम निर्वाचन पछि नेपाली राजनीतिका सबैभन्दा विवादास्पद पात्र पनि हुन् ।
टेलिभिजन पत्रकारिता छोडेर गत आम निर्वाचन अघि राष्ट्रिय स्वतन्त्र पार्टी (रास्वपा) खोलेर २० सिट जितेपछि लामिछाने छोटो समयको लागि दुई पटक गृहमन्त्री भए । पछि आधा दर्जन जति सहकारी ठगी प्रकरणका घटना बाहिरिए पछि जेल परेका लामिछाने अहिले पनि नख्खु जेलमा छन् । जेन जी आन्दोलनका क्रममा उनी जेलबाट छुटेर रुफ टप गाडीबाट हात हल्लाउँदै निस्किएपछि उनी थप विवादित भए । केही दिनपछि उनी पुनः कारागार फर्किए ।
लगभग ६ महिना कार्यकाल भएका अहिलेका मन्त्री जगदीश खरेलले कस्तो काम गर्लान् त्यो भने केही महिनापछि स्पष्ट हुनेछ ।
