विराटचाेकः माेरङको सुन्दरहरैंचामा आइतबार सार्वजनिक स्थलको रिपोर्टिङ गरिरहेका पत्रकारहरुलाई भिडियो नखिच्न भन्दै अवरोध गर्ने मोरङका प्रमुख जिल्ला अधिकारी इन्द्रदेव यादवले माफी मागेका छन् ।
प्रजिअ यादवको सो कार्यको चौतर्फी आलोचना भएपछि सोमबार जिल्ला प्रशासन कार्यालय मोरङमा भएको छलफलका क्रममा प्रजिअ यादवले गल्ती भएको महशुस गर्दै माफी मागेका हुन् ।
पत्रकारलाई भिडियो छायाँकनका लागि अवरोध गरेको विषयका समाचार विभिन्न सञ्चारमाध्यममा आएपछि प्रजिअ यादवले छलफलबाट समस्या समाधान गर्न आफू तयार रहेको भन्दै नेपाल पत्रकार महासंघ मोरङलाई जानकारी गराएपछि दुई पक्षबीच जिल्ला प्रशासन कार्यालय मोरङमा छलफल भएको हो ।
छलफलमा प्रजिअ यादवले आफूले नियतवश त्यसो नगरेको र आगामी दिनमा समेत त्यस प्रकारका गल्ती नदोहोर्याउने प्रतिबद्धता जनाएपछि नेपाल पत्रकार महासंघ मोरङले घटनालाई अघि नबढाउने निष्कर्ष निकालेको सहसचिव रेवतीरमण निरौलाले जानकारी दिनुभयो । प्रजिअ यादव पत्रकारहरुलाई रिपोर्टिङ गर्ने क्रममा सहज रुपमा सूचना उपलब्ध गराएर सहयोग गर्दै आएका व्यक्ति भएकाले समेत आइतबार भूलबस भएको कार्यलाई मानवीय त्रुटी सम्झिएर क्षमा गरिएको निरौलाले जानकारी दिनुभयो ।
छलफलमा पत्रकारहरुको तर्फबाट नेपाल पत्रकार महासंघ नेपालका केन्द्रीय सदस्य कमल रिमाल, नेपाल पत्रकार महासंघ मोरङका अध्यक्ष सुशीला पाठक, पूर्वअध्यक्ष महेन्द्र विष्ट, उपाध्यक्ष सन्तोष सिग्देल, सचिव नेत्र पी अधिकारी, सहसचिवद्वय रेवतीरमण निरौला र श्यामसुन्दर सुतिहार, कोषाध्यक्ष कौशल निरौला, प्रेस चौतारी नेपालका केन्द्रीय सदस्य सुमन सुस्केरा, मोरङ अध्यक्ष चिना थापा र सहसचिव कृष्णचन्द्र सुवेदीको सहभागिता रहेको थियो भने जिल्ला प्रशासन कार्यालयको तर्फबाट प्रमुख जिल्ला अधिकारी इन्द्रदेव यादव र सहायक प्रमुख जिल्ला अधिकारी विनोदकुमार पोखरेलको उपस्थिति रहेको थियो ।
मोरङको सुन्दरहरैँचा ७ स्थित गछिया खोलामा निर्माण गर्न लागिएको क्रसरको विषयमा आइतबार विवाद भएपछि अनुगमनमा पुगेका प्रजिअ यादवले रिपोर्टिङका लागि पुगेका पत्रकारहरुलाई भिडियो नखिच्न भन्दै रोक लगाएका थिए ।
स्थानीवासी, क्रसरका सञ्चालक, जिल्ला समन्वय समिति प्रमुख अजम्वर राई र नगर प्रमुख केदार गुरागाईसहितको उपस्थितिमा भएको कुराकानीको छायाँकन गरिरहेका पत्रकारहरु नेपाल पत्रकार महासंघ मोरङका सहसचिव तथा मोरङ खबरका सञ्चालक रेवतीरमण निरौला, विराट टेलिभिजन इटहरीका विकल पौडेल, न्यूज २४ टेलिभिजनका मनोज भुजेल र पूर्वी अनलाइनका पत्रकार कृष्णचन्द्र सुवेदीलाई प्रजिअ यादवले भिडियो नखिच्न भन्दै रोक लगाएका थिए ।
अनुगमनको अन्त्यमा नेपाल पत्रकार महासंघ मोरङका सहसचिव रेवती रमण निरौलाले अनुगमनबाट के निष्कर्ष निस्कियो भनेर प्रश्न गरेर भिडियो रेकर्ड गर्न खोज्दा समेत प्रजिअ यादवले हातले क्यामरा हटाएका थिए ।
