धरानः बीपी कोइराला स्वास्थ्य विज्ञान प्रतिष्ठानले मिदास हेल्थ सर्भिसेजसँगको सहकार्यमा नयाँ अस्पताल मोबाइल एप सार्वजनिक गरेको छ । यस एपमार्फत् बिरामीहरूले मोबाइल फोन प्रयोग गरी ओपीडी टिकट बुकिङ, टाढैबाट अपोइन्टमेन्ट निर्धारण, र प्रयोगशाला रिपोर्ट डिजिटल रूपमा प्राप्त गर्न सक्नेछन् ।
प्रतिष्ठानका अनुसार सो एपको मुख्य विशेषता भनेको नेपाल सरकारको स्वास्थ्य बीमा बोर्डको प्रणालीसँगको सहज समन्वय (एपीआई सिंक) हो । यसअन्तर्गत बीमितले आफ्नो बीमा स्थिति वास्तविक समयमा प्रमाणीकरण गर्न सक्ने, बीमा सुविधाअन्तर्गत स्वतः ओपीडी टिकट बुक गर्न सक्ने र प्राप्त बीमाअनुसार निःशुल्क सेवा उपभोग गर्न सक्नेछन् ।
मिदास हेल्थ सर्भिसेजले नयाँ एपको सहायताले अनलाइनमार्फत् ओपीडी टिकट बुकिङ तथा भुक्तानी, मोबाइल फोनबाटै अपोइन्टमेन्ट निर्धारण, प्रयोगशाला रिपोर्ट डिजिटल पहुँच तथा बीमितका लागि निःशुल्क सेवा र बीमाको अवस्था प्रमाणीकरण सहजै गर्न सकिने उल्लेख गरेको छ ।
बीपी कोइराला स्वास्थ्य विज्ञान प्रतिष्ठान र मिदास हेल्थ सर्भिसेजबीचको यो सहकार्यले नेपालमा डिजिटल स्वास्थ्य सेवा रूपान्तरणको दिशामा उल्लेखनीय योगदान पुर्याउने विश्वास लिइएको पनि दुवै संस्थाले उल्लेख गरेका छन् ।
