उर्लाबारीः मोरङको उर्लाबारी नगरपालिकामा गठित ‘पहिलो जाति धिमाल व्यवस्थापन समिति’ले चौथो स्थापना दिवसका अवसरमा सोमबार वृक्षरोपण गरेको छ ।
उर्लाबारी–३ मंगलबारेस्थित धिमाल जातीय विकास केन्द्रको १० बिघे परियोजनास्थलमा धुपी, कल्की र अशोक प्रजातिका करिब १ सय बिरुवा रोपिएको हो ।
समितिले उर्लाबारी नगरपालिकाभित्र रहेका १९ वटै धिमाल गाउँ÷टोल विकास समितिहरूलाई आफ्ना कार्यालय व्यवस्थित राख्नका लागि १÷१ थान स्टिलको दराज, अफिस टेबल र अफिस कुर्सी वितरण गरेको छ । समितिका सचिव सुनिल धिमालका अनुसार ४ लाख मूल्यबराबरको सामान वितरण गरिएको हो ।
कार्यक्रमका प्रमुख अतिथि कोशी प्रदेश सभा सदस्य नम्बरलाल धिमालले समितिले गर्दै आएका कार्यको प्रशंसा गर्नुभएको थियो ।
विशिष्ट अतिथि उर्लाबारी नगरपालिकाकी उपप्रमुख मीना खतिवडा पौडेलले उर्लाबारी नगरपालिकाले पहिलो जातिका रूपमा धिमाल समुदायलाई निरन्तर बजेट विनियोजन गर्दै आएको बताउनुभयो ।
कार्यक्रममा धिमाल जातीय विकास केन्द्रका महासचिव मातृका धिमाल, संविधानसभा सदस्य नगेन्द्र धिमाललगायतको उपस्थिति रहेको थियो । समितिका अध्यक्ष नारायण धिमालको अध्यक्षतामा भएको कार्यक्रमको सञ्चालन सचिव सुनिल धिमालले गर्नुभएको थियो भने स्वागत मन्तव्य उपाध्यक्ष कविकुमार धिमालले राख्नुभएको थियो ।
२०७८ साल असार ३० गते उर्लाबारी नगर कार्यपालिकाको नगरसभाले धिमाल जातिलाई ‘पहिलो जाति’ घोषणा गरेको ऐतिहासिक दिनको सम्झनामा हरेक वर्ष असार ३० गते स्थापना दिवस मनाउने गरिन्छ ।
