सलकपुरः राष्ट्रिय निजी तथा आवासीय विद्यालय एसोसिएसन नेपाल (एनप्याब्सन) कोशी प्रदेशले ‘विद्यालय शिक्षामा परिवर्तनकारी नेतृत्व’ विषयक कार्यशाला कार्यक्रम शनिबार मोरङको सुन्दरहरैंचास्थित सलकपुरमा सम्पन्न गरेको छ ।
कार्यशालामा कोशी प्रदेशका विभिन्न जिल्लाबाट सहभागी संस्थापक प्रिन्सिपल तथा शिक्षकहरूको शैक्षिक र संगठनात्मक विकासलाई लक्षित गर्दै विभिन्न प्रस्तुति दिइएको थियो । प्रगतिशील शिक्षा, २१ औं शताब्दीको स्मार्ट सिकाइ, विद्यालय शिक्षामा कृत्रिम बुद्धिमत्ता (एआई) पाठ्यक्रम लगायतका समसामयिक विषयहरूमा विस्तृत छलफल तथा प्रशिक्षण कार्यशालमा समेटिएको थियो ।
एन प्याब्सनकी संस्थापक अध्यक्ष तथा संविधानसभा सदस्य गीता राणाको प्रमुख आतिथ्यतामा भएको कार्यशालामा एन प्याब्सनका महासचिव प्रतापबहादुर थापा, शिक्षासेवी ऋतुराज सापकोटा, पाण्डव हमाल ठकुरी, सूर्यबहादुर अधिकारी, कुमारबहादुर भट्टराई लगायत उपस्थित हुनुहुन्थ्यो । कार्यशालामा कोशी प्रदेशका विभिन्न जिल्लाबाट १०० जनाभन्दा बढी सहभागी उपस्थित हुनुहुन्थ्यो ।
