धरानः नझरेका फूलहरुले धरान सङ्गीत प्रतिष्ठानसँगको सहकार्यमा प्रतिष्ठानको कार्यालय धरानमा शनिबार आयोजना भएको पलेँटी साँझमा सुन्दरहरैंचाका साहित्यकार पुरन याक्खालाई नगद ५१ हजार १५१ सहित सम्मान गरिएको छ । कार्यक्रममा सुन्दरहरैंचाका सञ्चारकर्मी कृष्णचन्द्र सुवेदीलाई कदरपत्र प्रदान गरिएको छ ।
कार्यक्रममा कवि याक्खाले हालै प्रकाशित आफ्नो पहिलो कविता सङ्ग्रह ‘गर्भभित्र’ का केही कविता सुनाउनुभएको थियो । त्यसैगरी, साहित्यकार किरण टी लिम्बू, सिजन श्रेष्ठ, देवान किराती, युवराज ठकुरी, गीताप्रसाद श्रेष्ठ, रुपनारायण श्रेष्ठ, खेमराज आचार्य र वासुदेव अधिकारीले सम्मानित स्रष्टा पुरन याक्खाका एकएक वटा कविता वाचन गर्नुभएको थियो ।
कार्यक्रममा गायक पम्फा चाहार, दुर्गा पराजुली, कृष्णराजा श्रेष्ठ र मेरिना राईले गीत गाउनुभएको थियो ।
साहित्यकार बम देवानको प्रमुख आतिथ्यता र धरान सङ्गीत प्रतिष्ठानका अध्यक्ष रमेश राईको सभापतित्वमा कार्यक्रम भएको थियो ।
