इटहरीः अन्तर्राष्ट्रिय आमन्त्रण इटहरी गोल्डकप फुटबल प्रतियोगिताको १५ औँ संस्करण शनिबार इटहरी रङ्गशालामा हिजोदेखि शुरू भएको छ । प्रतियोगिताको उद्घाटन इटहरी उपमहानगरपालिकाका नगरप्रमुख हेमकर्ण पौडेलले गर्नुभएको थियो ।
उद्घाटन खेलमा आयोजक टोली राष्ट्रिय जागृति (राजा) क्लबलाई लाई पाहुना टोली युनाइटेड खर्साङ क्लब (युकेएफसी) ले २–१ गोल अन्तरले पराजित गरेको छ । खेलको ११ औँ मिनेटमा आयोजक राजा क्लबका लागि विदेशी खेलाडी एलेक्सले गोल गरे पनि खेलको २१ औँ मिनेटमा युकेएफसीका सत्यम् शर्माले गोल फर्काएर खेललाई बराबरीमा ल्याएका थिए ।
पहिलो हाफमा १–१ बराबरीमा सकिए पनि युकेएफसीका लागि हेमराज भुजेलले थप १ गोल गर्दै टिमलाई सेमीफाइनलमा पुर्याएका थिए । खेलको म्यान अफ दि म्याच विजेता टिमका पहिलो गोलकर्ता सत्यम शर्मा घोषित हुँदै नगद १० हजार प्राप्त गरे ।
आजको खेल साबिक विजेता सगरमाथा युथ क्लब मोरङ र हालै धरानमा सम्पन्न २५ औँ बुढासुब्बा गोल्डकपको विजेता एनआरटी क्लब काठमाडौंबीच हुनेछ । फागुन १० गतेसम्म चल्ने प्रतियोगितामा नेपालका सात तथा एक विदेशी टिम गरी आठ टोली सहभागी छन् ।
प्रतियोगिताको विजेताले नगद १० लाख रुपैयाँ प्राप्त गर्नेछ भने उप–विजेताले पाँच लाख रुपैयाँ प्राप्त गर्ने आयोजकले जनाएको छ ।
