विराटनगरः विराटनगरस्थित डिग्री क्याम्पसमा यही माघ २५ गतेदेखि २८ गतेसम्म चौथो प्रादेशिक स्काउट ज्याम्बोरेट हुने भएको छ । प्रदेश स्काउट कार्यालय, कोशीको आयोजनामा माघ २८ गतेसम्म ज्याम्बोरेट सञ्चालन हुने भएको हो ।
३ हजार स्काउटहरूको सहभागिता हुने ज्याम्बोरेटमा स्काउटसँग सम्बन्धित विभिन्न साहसिक, मनोरञ्जनात्मक, सांस्कृतिक र बौद्धिक क्रियाकलापहरू सञ्चालन हुने भएका छन् । सो ज्याम्बोरेटमा कोशी प्रदेशका सम्पूर्ण स्थानीय तहबाट छनोट भएका स्काउटहरू सहभागी हुनुका साथै अन्य ६ वटा प्रदेशबाट प्रतिनिधिमूलक रूपमा स्काउटहरूको सहभागिता हुने प्रदेश अधिकृत नवराज घिमिरेले जानकारी दिनुभयो ।
प्रत्येक ४ वर्षमा हुने ज्याम्वोरेटमा स्काउटमा संलग्न ११ वर्षदेखि १६ बर्षसम्मका स्काउट विधार्थीहरू सहभागी हुने बताइएको छ । सो ज्याम्बोरेट सम्पन्न गर्नका लागि प्रदेश प्रमुख आयुक्त हेमन्त भण्डारीको संयोजकत्वमा १३ सदस्यीय आयोजक कमिटी बनेको छ । त्यस्तै, कोशी प्रदेशका मुख्यमन्त्री एवं प्रदेश स्काउट संरक्षक हिक्मतकुमार कार्कीको संरक्षकत्वमा सामाजिक विकास मन्त्री पाँचकर्ण राईको अध्यक्षता सल्लाहकार समिति गठन गरिएको घिमिरेले जानकारी दिनुभयो ।
ज्याम्बोरेटको तयारीका लागि २५ वटा विभिन्न उपसमितिहरू बनाएर काम अघि बढाउनुका साथै ज्याम्बोरेटका क्रियाकलापहरू सञ्चालन गर्न २०५ जनाको सर्भिस टिम बनाइ तयारीलाई तीव्रता दिइएको बताइएको छ । ज्याम्बोरेटमा विभिन्न साहसिक, बौद्धिक, मनोरञ्जनात्मक तथा सिर्जनात्मक खेल र प्रस्तुति हुने आयोजकले जनाएो छ ।
ज्याम्बोरेट सञ्चालनका लागि ३५ लाख २० हजार रुपैयाँ खर्च हुने अनुमान गरिएको र सो रकम प्रदेश सरकार, सामाजिक विकास मन्त्रालय, राष्ट्रिय प्रधान कार्यालय, सहयोग संघसङ्गठन र दाताहरूबाट जुटाइने घिमिरेद्वारा विज्ञप्तिमा जनाइएको छ ।
