विराटचोकः गार्डियन माइक्रोलाइफ सर्वसाधारणका लागि आइपीओ निकाल्ने पहिलो लघुबीमा कम्पनी हुने भएको छ । कम्पनीले आज पुस २१ गतेदेखि आइपीओ निष्कासन गर्ने भएको छ ।
कम्पनीले प्रतिकित्ता १०० रुपैयाँका अंकित दरमा २२ लाख ५० हजार कित्ता आइपीओ जारी गर्न नेपाल धितोपत्र बोर्डबाट अनुमति पाएको थियो । जसमध्ये वैदेशिक रोजगारीमा रहेका नेपालीलाई २ लाख २५ हजार कित्ता आइपीओ बिक्री गरिसकेको छ । ६७ हजार ५०० कित्ता सेयर कर्मचारी र १ लाख १२ हजार ५०० कित्ता सेयर सामुहिक लगानी कोषका लागि सुरक्षित गरिएको छ । सर्वसाधारणले बाँकी रहेको १८ लाख ४५ हजार कित्ता सेयरका लागि आवेदन दिन सक्नेछन् ।
न्यूनतम १० कित्तादेखि अधिकतम १ लाख कित्ताका लागि आवेदन दिन पाइने कम्पनीको आइपीओ बिक्री प्रबन्धक कुमारी क्यापिटलले जनाएको छ । कम्पनीको आइपीओमा सी–आस्वा प्राप्त बैंक तथा वित्तीय संस्था तथा मेरो सेयरमार्फत् पुस २४ गतेसम्म आवेदन दिन सकिने जनाइएको छ ।
