विराटचोकः नेपाल नर्सिङ संघको नयाँ कार्यसमिति चयनका लागि भोलि निर्वाचन हुँदैछ । संघको चुनावमा एमाले–माओवादी तथा कांग्रेस–एकीकृत समाजवादीसमर्थित संगठनले गठबन्धन गरेका छन् ।
देशभर २० मतदान केन्द्र तोकिएको छ । निर्वाचनमा मतदाताले बिहान ७ बजेदेखि बेलुका ५ बजेसम्म मतदान गर्न सक्ने निर्वाचन समितिले जनाएको छ । निर्वाचनमा नेपाल नर्सिङ संघका साधारण तथा आजीवन सदस्यहरुले मात्र मत दिन पाउनेछन् ।
निर्वाचनमा नेकपा एमाले र नेकपा माओवादी केन्द्र निकट नर्सहरुले प्रगतिशील प्यानल बनाएर उम्मेदवारी दिएका छन् भने नेपाली कांग्रेस र एकीकृत समाजवादी निकटहरुले संयुक्त नर्सिङ पेशागत प्यानल बनाएर उम्मेदवारी दिएका छन् ।
एमाले–माओवादी गठबन्धनबाट एमालेकी चन्द्रकला शर्मा र कांग्रेस–एकीकृत समाजवादीबाट एकीकृत समाजवादीकी गंगाकुमारी थापा अध्यक्षका उम्मेदवार छन् । एमालेबाट वसन्ती थापाले बागी उम्मेद्वारी दिनुभएको छ ।
महासचिवमा प्रगतिशील प्यानलबाट एमालेनिकट डा. देवकाकुमारी आचार्य र पेशागत प्यानलबाट कांग्रेसनिकट मीनाकुमारी कार्कीको उम्मेदवारी परेको छ । जानकी धामीले स्वतन्त्र उम्मेदवारी दिनुभएको छ ।
वरिष्ठ उपाध्यक्षमा प्रगतिशीलबाट एमाले निकटका रमेश सुब्बा र पेशागतबाट वरिष्ठ उपाध्यक्षमा कांग्रेसनिकट कल्पना श्रेष्ठ जोशी उम्मेद्वार हुनुहुन्छ । उपाध्यक्षमा एमाले–माओवादी गठबन्धनबाट माओवादीनिकट बबिता घिमिरे र कांग्रेस–समाजवादी गठबन्धनबाट कांग्रेसनिकट मनिषा कोइरालाको उम्मेदवारी परेको छ ।
कोषाध्यक्षमा प्रगतिशीलबाट तुलसादेवी अधिकारी र पेशागतबाट रमादेवी पहारी ज्ञवालीको उम्मेदवारी परेको छ । सचिव पदमा प्रगतिशीलबाट बेली पौडेल र पेशागतबाट जया मिश्राको उम्मेदवारी परेको छ ।
सदस्य पदमा प्रगतिशील समूहबाट मेनुका पोख्रेल, हरि कोजु, कला बस्याल, कोपिला विश्वकर्मा, पासपति जयसवाल, सवेनाज बेगम, जानुका मोक्तान र शान्तिकुमारी विश्वकर्मा उम्मेद्वार हुनुहुन्छ ।
पेशागत समूहबाट सदस्यहरुमा सानुकुमारी विष्ट, रुपादेवी थापा, रती पक्वाङ, निशा विक, अञ्जु ठाकुर, जाफ्रे आलम अन्सारी, सफला बुढाथोकी र सीताकुमारी प्याकुरेल उम्मेद्वार हुनुुहुन्छ ।
परिषद् सदस्यमा प्रगतिशीलबाट राधादेवी आचार्य, सुमिता पाठक र राजदेवी अधिकारी तथा पेशागतबाट ज्ञानु महर्जन, मित्रा देवकोटा र सरला केसी उम्मेद्वार हुनुहुन्छ ।
यसअघि नेपाल कम्युनिस्ट पार्टी समर्थक नर्सको प्यानल विजयी भएको थियो । त्यतिबेला प्रगतिशील समूहकी मनकुमारी राई १२ सय मतको फराकिलो अन्तरसहित निर्वाचित हुनुभएको थियो । राईले ३ हजार २७६ मत प्राप्त गर्दा नेपाली कांग्रेस समर्थित प्रजातान्त्रिक समूहकी मुना राना थापाले २ हजार ८५ मत पाउनुभएको थियो ।
