इटहरीः तामाङ जातीको लोपोन्मुख हुँदै गएको भाषा, लिपि, भेषभुषा, कला, संस्कार र संस्कृतीको संरक्षण तथा सम्बर्द्धन गर्ने उद्देश्य सहित निर्माण गरिएको चलचित्र ‘चारदाम’ को एक गीत र ट्रेलर सार्वजनिक गरिएको छ । इटहरीमा एक कार्यक्रमको आयोजना गर्दै चलचित्र युनिटले ट्रेलर र ‘मेरो अङ्गालोमा’ बोलको गीत सार्वजनिक गरेको हो । मोहन लोप्चन तामाङ प्रस्तुतकर्ता रहेको चारदाम फिल्म कोशी भिजनको ब्यानरमा निर्माण गरिएको हो ।
सार्वजनिक गरिएको ट्रेलर र गीतलाई युट्युबमा भने निर्माण कम्पनी कोशी भिजनकै नामम रहेको युट्युब च्यानलबाट सार्वजनिक गरिने निर्माण युनिटले जानकारी गराएको छ ।
ट्रेलर तथा गीत सार्वजनिक कार्यक्रमम नेपाल तामाङ घेदुङका केन्द्रीय संरक्षक सदस्य मनु मोक्तान, लक्ष्मण मोक्तान, जिल्ला उपाध्यक्ष हस्त पाख्रीन, नगर अध्यक्ष मोहन लोप्चन, महिला नगर अध्यक्ष कोपिला घिसिङ, संघीय सदस्य जानुकला पाख्रीन, फिल्म नाङ्साल निर्माता तथा कलाकार गणेश योञ्जन तामाङको उपस्थिति रहेको थियो ।
चलचित्रको मंसिर ३० गते इटहरीमा प्रिमियर शो गरिने भएको छ । इटहरीपछि काठमाडौ, पोखरा, भोजपुर, धरान, बेलबारी लगयतका ठाउँमा प्रिमियर शोको तयारी भएको बताइएको छ ।
भोजपुर र सुनसरीको विभिन्न स्थानमा छायांकन गरिएको यो चलचित्रमा ३ ओटा गीत समावेश छ । ‘चारदाम’मा सुकुमाया मोक्तान तामाङ, सुवास योञ्जन तामाङ, मदन राई, शान्ति पाख्रीन, पूर्ण लिम्बू, मोहन लोप्चन, मेनुका राई, डम्बरकुमारी लिम्बू, कान्छा लामा, बाल कलाकार सुम्निमा तामाङ लगायत कलाकारहरुको अभिनय रहेको छ ।
मैना घिसिङ, मदनबहादुर राई, पूर्ण लिम्बू, वर्षा राजभण्डारी तामाङले चलचित्र निर्माण गरेका हुन् । चलचित्रमा दीपक लिम्बू, मुना ठटाल, पूर्ण लिम्बू, जोनी तामाङ र पदम ग्याबाले गीत गाएका छन् । प्रेमकृष्ण बजगाई र जोनी योञ्जनले संगीत गरेको गीतमा बजगाई, निर्देशक लाखमान र पूर्ण लिम्बूको शब्द समावेश गरिएको छ । गीतहरुमा एरेन्ज राजु कार्की र जोनी तामाङले गरेका छन् । सुमन तामाङको छायांकन तथा हेमन तामाङको सम्पादन रहेको छ भने अशोक मण्डलको शृङ्गार चलचित्रमा देख्न सकिन्छ ।
