विराटनगरः कोशी प्रदेशमा पहिलो पटक पूर्व सिकाइ मान्यता विधिबाट सीप सिकेका व्यक्तिहरूलाई सीप परीक्षणको प्रमाणपत्र प्रदान गरिएको छ । सामाजिक विकास मन्त्रालयले एक कार्यक्रमको आयोजना गरी पूर्व मान्यता सिकाई प्रणाली (आरपिएल) विधिबाट सीप सिकेका व्यक्तिहरूलाई पहिलो र दोस्रो तहको सीप परीक्षणको प्रमाणपत्र उपलब्ध गराएको हो ।
मन्त्रालयका अनुसार पहिलो चरणमा सीप परीक्षण गराएकाहरू मध्ये २१ जनालाई सीप परीक्षणको प्रमाणपत्र प्रदान गरिएको हो । २०७९ वैशाखमा राष्ट्रिय सीप परीक्षण समितिले परम्परागत सीपको आधारमा सीप परीक्षण गराउन आह्वान गरेको थियो । सो अवधिमा ४ सय ७ जनाले आवेदन दिएका थिए । आवेदन दिएका मध्ये २०८० भदौमा भएको सीप परीक्षणसम्बन्धी परामर्शमा २ सय ५२ जना सहभागी भएका थिए । ती सहभागीमध्ये ९९ जना अनुत्तीर्ण भएका थिए ।
परीक्षामा उत्तीर्णमध्ये २१ जनालाई प्रमाणपत्र दिइएको हो । सामाजिक विकास मन्त्रालयका शाखा अधिकृत गोपाल दाहालका अनुसार तह २ को वेल्डरमा ३ जना र तह १ को गार्मेन्ट फेब्रिकेटरका १८ जनालाई प्रमाण पत्र प्रदान गरिएको हो । स्वीस सरकार र नेपाल सरकारको संयुक्त लगानीमा सीप परीक्षण कार्यक्रम सञ्चालनमा छ । यो कार्यक्रमले पूर्व मान्यता विधिबाट लिइएका सीपको परीक्षण गरी दक्ष बनाउने प्रयास भएको सामाजिक विकास मन्त्रालयका महाशाखा प्रमुख कृष्ण पोखरेलले बताउनुभयो ।
यो सीपले नेपालमै मात्र हैन वैदेशिक रोजगारीमा जानेहरुको लागि समेत बाटो खोलिदिएको सामाजिक विकास मन्त्रालयका सचिव लक्ष्मीप्रसाद भट्टराई बताउनुहुन्छ ।
कार्यक्रममा सामाजिक विकास मन्त्रालयका उपसचिव दामोदर फुयल, एनएसटिबीका कार्यक्रम संयोजक गीता लिम्बूलगायतले आफ्नो भनाइ राख्नुभएको थियो ।
